Елордадағы Mega Silk Way сауда-ойын-сауық орталығында Қазақстан Республикасы Конституциясының жаңа редакциясын қолдауға арналған ауқымды концерт өтті. Бұл туралы Астана әкімдігінің ресми сайты елордалық «Әділетті және прогрессивті Қазақстанның халықтық Конституциясы үшін!» жалпыұлттық коалициясының қалалық филиалына сілтеме жасап хабарлады.
Іс-шара «Әділетті және прогрессивті Қазақстанның халықтық Конституциясы үшін!» жалпыұлттық коалициясының қызметі аясында ұйымдастырылып, елорда тұрғындары мен қонақтарын конституциялық өзгерістер идеясы төңірегінде біріктірді.
Ұйымдастырушылардың мәліметінше, концертке 5 мыңға жуық адам қатысты. Олардың қатарында жастар, қоғам өкілдері және сауда-ойын-сауық орталығының келушілері болды. Іс-шара атмосферасы азаматтық белсенділік пен қоғамның алдағы өзгерістерге деген қызығушылығын айқын көрсетті.
Сахнада қазақстандық эстрада жұлдыздары – Маржан Арапбаева, «Бәйтерек» тобы, Еркеш Хасен, Мәди Сыздықов, «Жошы» тобы, Зарина Божакова және Мирас Жүгінісов өнер көрсетті.
Концерт барысында жиналған қауым алдында Қазақстан Республикасы Парламенті Мәжілісінің депутаттары, Астана қаласы мәслихатының депутаттары, сондай-ақ Қоғамдық кеңес пен жалпыұлттық коалиция штабының мүшелері сөз сөйледі. Олар Конституцияның жаңа редакциясындағы негізгі ережелерді түсіндіріп, ұсынылып отырған өзгерістердің құқықтық мемлекетті одан әрі дамыту және қоғамдық бірлікті нығайту үшін маңыздылығын атап өтті.
Ұйымдастырушылар мұндай іс-шаралар азаматтарды ақпараттандыруға және алдағы референдум мәселелері бойынша ашық қоғамдық диалог қалыптастыруға бағытталғанын жеткізді.
