التىن وردانىڭ ءىزى، ۇلىتاۋدىڭ ءۇنى: استانادا ەرەكشە كورمە باستالدى

استانا تورىندە ۇلىتاۋ وبلىسىنىڭ ونەرپازدارى مەن قولونەر شەبەرلەرى ءوز تۋىندىلارىن تارتۋ ەتۋدە.

«التىن وردانىڭ مۇراسى: ۇلى دالادان باستاۋ العان ونەر» تاقىرىبىندا Creative Aimaq hub الاڭىندا ءوتىپ جاتىر.

كورمە اياسىندا ۇلىتاۋ وبلىسىنان كەلگەن 60-قا جۋىق شەبەر اعاشتان، بىلعارىدان، كەراميكا مەن كيىزدەن جاسالعان قولونەر بۇيىمدارى، زەرگەرلىك اشەكەيلەر، ەتنو-ءسان توپتامالارى مەن قۇراق كورپەلەرىن پاش ەتۋدە.

قوناقتار بىلعارى وڭدەۋ، اعاش ويۋ، ۇلتتىق مۋزىكالىق اسپاپتار جاساۋ، ۇستالىق ونەر سياقتى ءداستۇرلى كاسىپتەردىڭ قىر-سىرىن تانىستىراتىن شەبەرلىك ساباقتارنا قاتىسا الادى. سونىمەن قاتار قولونەرشى، سۋرەتشى جانە ديزاينەرلەرمەن شىعارماشىلىق كەزدەسۋلەر ۇيىمداستىرىلىپ، ۇلتتىق ونەردىڭ بۇگىنگى دامۋ باعىتتارى كەڭىنەن تانىستىرىلۋدا.
كەشكى باعدارلامادا جەزقازعاندىق Jezz Acoustic Band توبىنىڭ كونتسەرتىمەن جالعاسادى.

جوبا وتاندىق قولونەر شەبەرلەرىن، ديزاينەرلەر مەن سۋرەتشىلەردى، شىعارماشىلىق كاسىپكەرلەردى قولداۋعا، سونداي-اق Made in Kazakhstan ۇلتتىق برەندىن دامىتۋعا باعىتتالعان.
Qazaq Creative Hub الاڭىندا ءوتىپ جاتقان كورمەدە ۇلىتاۋدىڭ تاريحي-مادەني مۇراسى زاماناۋي ديزاين، قولونەر، ەتنو-ءسان جانە تسيفرلىق تەحنولوگيالار ارقىلى تانىستىرىلۋدا.

كورمە بارىسىندا شەبەرلەر ءوز ونىمدەرىن تانىستىرىپ قانا قويماي، باسقا وڭىرلەردەن كەلگەن كاسىپكەرلەرمەن جاڭا سەرىكتەستىك بايلانىستار ورناتىپ، بولاشاق بىرلەسكەن جوبالاردى تالقىلاپ جاتىر.

كورمەدە ۇلتتىق قولونەر بۇيىمدارىمەن قاتار كرەاتيۆتى يندۋستريانىڭ جاڭا باعىتتارى دا ۇسىنىلعان. اتاپ ايتقاندا، ۇلىتاۋدان كەلگەن IT سالاسىنىڭ وكىلدەرى ءوڭىردىڭ تابيعاتى، تاريحى مەن سالت-ءداستۇرىن تانىستىراتىن تسيفرلىق جوبالار مەن مۋلتيمەديالىق جۇمىستارىن كوپشىلىك نازارىنا شىعاردى.

ۇيىمداستىرۋشىلاردىڭ ايتۋىنشا، مۇنداي جوبالار وڭىردەگى شىعارماشىلىق يندۋستريانىڭ دامۋىنا سەرپىن بەرىپ، قازاقستاندىق ونىمدەردى كەڭىنەن ناسيحاتتاۋعا مۇمكىندىك بەرەدى.