اقش مەملەكەتتىك دەپارتامەنتى رەسەي ازاماتتارى ءۇشىن يمميگراتسيالىق ەمەس ۆيزالارعا ءوتىنىش قابىلدايتىن ورىن رەتىندە استانانى بەلگىلەدى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەمە جاساپ.
«مەملەكەتتىك دەپارتامەنت يمميگراتسيالىق ەمەس ۆيزا (NIV) الۋعا ءوتىنىش بەرىپ، سۇحباتقا جازىلۋشى بارلىق ازاماتتارعا ارنالعان نۇسقاۋلىقتى جاڭارتتى:
اقش-تىڭ يمميگراتسيالىق ەمەس ۆيزاسىن الۋ ءۇشىن ءوتىنىش بەرۋشىلەر ءوز ەلىندەگى نەمەسە تۇرعىلىقتى جەرىندەگى اقش ەلشىلىگىنە نە كونسۋلدىعىنا سۇحباتقا جازىلۋى كەرەك;
اقش ۇكىمەتى يمميگراتسيالىق ەمەس ۆيزالاردى ستاندارتتى راسىمدەۋ جۇرگىزبەيتىن ەلدەردىڭ ازاماتتارى، ەگەر باسقا ەلدە تۇرمايتىن بولسا، ءتيىستى ەلشىلىكتەرگە نەمەسە كونسۋلدىقتارعا ءوتىنىش بەرۋى قاجەت.
يمميگراتسيالىق ەمەس ۆيزاعا ءوتىنىش بەرۋدىڭ تاعايىندالعان ورىندارىن تومەندەگى تىزىمنەن قاراڭىز. تاعايىندالعان ورىندار: ازاماتتىعى – رەسەي; قابىلداۋ ورىندارى – استانا، ۆارشاۆا»، – دەلىنگەن اقش مەملەكەتتىك دەپارتامەنتىنىڭ حابارلاماسىندا.
بەرىلگەن اقپاراتقا سايكەس، رەسەي ازاماتتارىنان ءوتىنىش قابىلداۋ ورنى رەتىندە استانانى بەلگىلەۋ تۋرالى شەشىم 6 قىركۇيەكتە قابىلدانعان.
