استانا قالاسىندا «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسىنىڭ استانا قالالىق فيليالىنىڭ وكىلدەرى «جەڭىس» فۋتبول ورتالىعىندا تاربيەلەنىپ جاتقان بالالاردىڭ اتا-انالارىمەن جانە ورتالىق جاتتىقتىرۋشىلارىمەن مازمۇندى كەزدەسۋ وتكىزدى. كەزدەسۋگە 400-گە جۋىق ادام قاتىسىپ، اشىق فورماتتا پىكىر الماستى.
ءىس-شاراعا جالپىۇلتتىق كواليتسيانىڭ استانا قالالىق فيليال جەتەكشىسى ەرلان كاناليموۆ جانە قازاقستان فۋتبول فەدەراتسياسى-نىڭ باس حاتشىسى داۆيد لوريا قاتىستى.
كەزدەسۋ بارىسىندا جاڭا كونستيتۋتسيالىق ۇلگىنىڭ نەگىزىندە ادام دامۋىنىڭ باسىمدىعى تۇرعانى، وڭىرىنە قاراماستان ءاربىر بالاعا تەڭ مۇمكىندىكتەر جاساۋ مەملەكەتتىك ساياساتتىڭ ماڭىزدى باعىتى ەكەنى اتاپ ءوتىلدى. بالالار مەن جاسوسپىرىمدەر سپورت سەكتسيالارىنىڭ قولجەتىمدىلىگى ارتىپ، جاڭا فۋتبول الاڭدارى مەن اكادەميالار سالۋ باعدارلامالارى جۇيەلى تۇردە جۇزەگە اسىرىلىپ جاتقانى ورتاعا سالىندى. بۇگىندە ەلىمىزدە بۇقارالىق فۋتبولمەن 1,1 ميلليوننان استام ادام قامتىلعانى سپورتتىڭ قوعامداعى ورنىنىڭ ايرىقشا ەكەنىن كورسەتەدى.
«كونستيتۋتسيالىق رەفورمالاردىڭ باستى وزەگى – ادام جانە ونىڭ الەۋەتى. بالالار سپورتىنا ينۆەستيتسيا سالۋ – بۇل ۇلت بولاشاعىنا سالىنعان ينۆەستيتسيا. ءاربىر بالا ساپالى ينفراقۇرىلىمعا، كاسىبي جاتتىقتىرۋعا جانە قاۋىپسىز ورتاعا قول جەتكىزۋى ءتيىس. كونستيتۋتسيادا بەكىتىلگەن الەۋمەتتىك ادىلەتتىلىك قاعيداتتارى سپورت سالاسىنىڭ دا تۇراقتى دامۋىنا قۇقىقتىق نەگىز قالىپتاستىرادى»،— دەپ اتاپ ءوتتى ەرلان كاناليموۆ.
«فۋتبول – تاربيە مەكتەبى. بۇل بالالارعا جاۋاپكەرشىلىك، ءتارتىپ پەن كوماندالىق رۋحتى ۇيرەتەتىن ورتا» — دەدى داۆيد لوريا، سونداي-اق فەدەراتسيانىڭ سپورتتىق جۇيەسىن دامىتۋعا ارنالعان ستراتەگيالىق جوسپارلارىمەن ءبولىستى. ول بالالار فۋتبولىنىڭ دامۋىنا باعىتتالعان مەملەكەتتىك ساياسات پەن قوعامدىق قولداۋدىڭ ماڭىزدىلىعىن اتاپ ءوتتى جانە رەسپۋبليكالىق دەڭگەيدە سپورتتى قولداۋدىڭ ارتىپ كەلە جاتقانىن ايتتى. 
كەزدەسۋ اشىق ءارى ينتەراكتيۆتى فورماتتا ءوتتى. اتا-انالار مەن جاتتىقتىرۋشىلار فۋتبول سالاسىنداعى ينفراقۇرىلىمدى جاقسارتۋ، جاتتىقتىرۋشىلاردىڭ مارتەبەسىن كوتەرۋ، بالالار جارىستارىن كوبەيتۋ جانە وڭىرلىك قولداۋدى كۇشەيتۋ ماسەلەلەرىن كوتەردى.
جالپىۇلتتىق كواليتسيانىڭ استانا قالالىق فيليالى الداعى ۋاقىتتا دا سپورت ۇيىمدارى، ءبىلىم بەرۋ سالاسى جانە وزگە دە الەۋمەتتىك سالا وكىلدەرىمەن كەزدەسۋلەر وتكىزىپ، كونستيتۋتسيالىق وزگەرىستەردىڭ ءمانىن ءتۇسىندىرۋ جۇمىستارىن جالعاستىرادى.
