Astana qalasynda «Ädılettı jäne progressivtı Qazaqstannyŋ halyqtyq Konstitusiiasy üşın!» Jalpyūlttyq koalisiiasynyŋ Astana qalalyq filialynyŋ ökılderı «Jeŋıs» futbol ortalyǧynda tärbielenıp jatqan balalardyŋ ata-analarymen jäne ortalyq jattyqtyruşylarymen mazmūndy kezdesu ötkızdı. Kezdesuge 400-ge juyq adam qatysyp, aşyq formatta pıkır almasty.
Is-şaraǧa Jalpyūlttyq koalisiianyŋ Astana qalalyq filial jetekşısı Erlan Kanalimov jäne Qazaqstan futbol federasiiasy-nyŋ Bas hatşysy David Loriia qatysty.
Kezdesu barysynda jaŋa konstitusiialyq ülgınıŋ negızınde adam damuynyŋ basymdyǧy tūrǧany, öŋırıne qaramastan ärbır balaǧa teŋ mümkındıkter jasau memlekettık saiasattyŋ maŋyzdy baǧyty ekenı atap ötıldı. Balalar men jasöspırımder sport seksiialarynyŋ qoljetımdılıgı artyp, jaŋa futbol alaŋdary men akademiialar salu baǧdarlamalary jüielı türde jüzege asyrylyp jatqany ortaǧa salyndy. Bügınde elımızde būqaralyq futbolmen 1,1 millionnan astam adam qamtylǧany sporttyŋ qoǧamdaǧy ornynyŋ airyqşa ekenın körsetedı.
«Konstitusiialyq reformalardyŋ basty özegı – adam jäne onyŋ äleuetı. Balalar sportyna investisiia salu – būl ūlt bolaşaǧyna salynǧan investisiia. Ärbır bala sapaly infraqūrylymǧa, käsıbi jattyqtyruǧa jäne qauıpsız ortaǧa qol jetkızuı tiıs. Konstitusiiada bekıtılgen äleumettık ädılettılık qaǧidattary sport salasynyŋ da tūraqty damuyna qūqyqtyq negız qalyptastyrady»,— dep atap öttı Erlan Kanalimov.
«Futbol – tärbie mektebı. Būl balalarǧa jauapkerşılık, tärtıp pen komandalyq ruhty üiretetın orta» — dedı David Loriia, sondai-aq federasiianyŋ sporttyq jüiesın damytuǧa arnalǧan strategiialyq josparlarymen bölıstı. Ol balalar futbolynyŋ damuyna baǧyttalǧan memlekettık saiasat pen qoǧamdyq qoldaudyŋ maŋyzdylyǧyn atap öttı jäne respublikalyq deŋgeide sportty qoldaudyŋ artyp kele jatqanyn aitty. 
Kezdesu aşyq ärı interaktivtı formatta öttı. Ata-analar men jattyqtyruşylar futbol salasyndaǧy infraqūrylymdy jaqsartu, jattyqtyruşylardyŋ märtebesın köteru, balalar jarystaryn köbeitu jäne öŋırlık qoldaudy küşeitu mäselelerın köterdı.
Jalpyūlttyq koalisiianyŋ Astana qalalyq filialy aldaǧy uaqytta da sport ūiymdary, bılım beru salasy jäne özge de äleumettık sala ökılderımen kezdesuler ötkızıp, Konstitusiialyq özgerısterdıŋ mänın tüsındıru jūmystaryn jalǧastyrady.
