تۇركىستان وبلىسى تۇرعىنىنىڭ وزىنە اماناتتالعان قوس باۋىرىنا قولى جەتپەي ءجۇر. قىتايدا قالعان ءىنىسىنىڭ 8 جانە 10 جاستاعى قوس پەرزەنتىن سارىاعاش اۋدانى ءبىلىم بولىمىندەگىلەر تارتىپ اكەتكەن.
ەندى ولاردى كورۋ ءۇشىن 130 شاقىرىم جول ءجۇرىپ شىمكەنتكە كەلەدى، دەپ حابارلادى "استانا" ارناسى.
سارىاعاش اۋدانىنىڭ تۇرعىنى قۇرمانعازى جامالبەك 19 قاراشادان بەرى ءۇش كۇن سايىن شىمكەنتكە سابىلىپ ءجۇر. ايتۋىنشا، قىتايدا تۇراتىن ءىنىسى 2019 جىلدىڭ جەلتوقسانىندا ەكى پەرزەنتىن مەكتەپكە ورنالاستىرۋ ءۇشىن ەلگە اكەلگەن. اعاسىنا سەنىم حات راسىمدەپ، ءوزى كەرى قايتقان.
"كارانتينگە بايلانىستى وتە الماي جاتىر. شەكارا اشىلاتىن بولسا قازىر-اق كەلەيىن دەپ تۇر. بالالاردىڭ مىنا جەردە جاتقانىن ولار دا قالامايدى. باۋىرلارىم اشۋلانىپ جاتىر. ءبىز اتاجۇرتىمىزعا كوشەمىز دەپ وتىرساق، بالالارىمىزدى قاماپ قويدى", - دەيدى سارىاعاش اۋدانىنىڭ تۇرعىنى قۇرمانعازى جامالبەك.
ايتا كەتەرلىگى، بەيىمدەۋ ورتالىعىندا بالالار 90 كۇندەي عانا بولا الادى. قازىر كورسەتىلگەن مەرزىم اياقتالۋعا تاياۋ. قۇجات دەر كەزىندە راسىمدەلىپ بىتپەسە، بالالار قىتايعا كەرى دەپورتاتسيالانۋى ابدەن مۇمكىن.
ء"بىز كوشى-قون ورگاندارىنا حات جولدادىق. ودان كەيىن بالالار قۇقىعىن قورعاۋ جونىندەگى كوميتەتكە دە، ءوزىمىزدىڭ باسشىلىققا دا، باسقارماعا دا حاتتار جولداندى. تيىسىنشە شەشىپ بەرەمىز دەگەن جاۋاپتار الىنىپ جاتىر", - دەيدى شىمكەنت قالاسى ءبىلىم باسقارماسى كامەلەتكە تولماعانداردى بەيىمدەۋ ورتالىعى ديرەكتورىنىڭ ورىنباسارى نازگۇل قۇرماناليەۆا.
ال سارىاعاش اۋداندىق ءبىلىم بولىمىندەگىلەردىڭ ءوز ءۋاجى بار. ولار بۇل جاعداي بالالاردى ورتالىققا وتكىزگەنگە دەيىن ابدەن زەرتتەلدى دەپ وتىر.
"تۇرمىستىق جاعدايى ساي كەلمەدى. ول كىسىنىڭ تابىس كوزى جوق ەدى. تۇراقتى تۇراتىن جەرى جوق. مەشىت جانىنداعى ۇيدە تۇردى. ۇل مەن قىزدىڭ جاتاتىن ورنى بولەك بولۋ كەرەك", - دەپ ءتۇسىندىردى سارىاعاش اۋداندىق ءبىلىم ءبولىمىنىڭ ادىسكەرى ايبەك قۇلقاراەۆ.
ءبىلىم بولىمىندەگىلەردىڭ بىلۋىنشە، قۇرمانعازى جامالوۆتىڭ ءوز باۋىرلارىن قامقورلىعىنا الاتىن ءبىر عانا مۇمكىندىگى بار كورىنەدى. ول ءۇشىن جاسوسپىرىمدەر قىتاي ازاماتى بولعاندىقتان قامقورشىلىققا الۋعا رۇقساتتى سول جاقتان الدىرتۋ قاجەت. مۇنان سوڭ اعالارى ءۇش ايلىق كۋرستان ءوتىپ، بالالارعا جاعداي جاسالعاننان كەيىن عانا قولى جەتەدى دەدى.
