قاراعاندى وبلىسىندا قاڭعىباس جانۋارلار ماسەلەسى قوعامدىق دابىل دەڭگەيىنە جەتتى، دەپ حابارلايدى "ادىرنا" ۇلتتىق پورتالى.
الەۋمەتتىك جەلى قولدانۋشىلارى مەن قالا تۇرعىندارى جەرگىلىكتى بيلىكتەن ناقتى شارا قولدانۋدى تالاپ ەتۋدە. سوڭعى جاعداي ءاليحان بوكەيحان اۋدانىندا تىركەلىپ، 10 جاسار بالانىڭ ومىرىنە قاۋىپ تونگەن.
بۇل تۋرالى تاريحشى ادىلەت جاعىپار الەۋمەتتىك جەلىسىندە جازدى.
ونىڭ سوزىنشە، چاپاەۆ كوشەسىندەگى 176-ءۇيدىڭ ماڭىندا قاڭعىعان يتتەر ءۇيىندىسى 10 جاسار ءاليحان ەسىمدى بالاعا شابۋىل جاساعان. كەزدەيسوق ءوتىپ بارا جاتقان تۇرعىننىڭ اراشا ءتۇسۋىنىڭ ارقاسىندا بالا امان قالدى. زارداپ شەككەن ءجاسوسپىرىم بىردەن №1 اۋرۋحاناعا جەتكىزىلىپ، مەديتسينالىق كومەك كورسەتىلدى. قازىرگى تاڭدا پوليتسيا قىزمەتكەرلەرى اتالعان دەرەك بويىنشا ارىز قابىلداپ، تەكسەرۋ جۇرگىزۋدە.
جەلى قولدانۋشىلارى بۇل ماسەلەنىڭ جۇيەلى سيپات العانىن ايتىپ، دابىل قاعۋدا.
"بالالارىمىزدىڭ زارەسى ۇشتى. ساباقتان كەشىكسە، 'يت قاۋىپ المادى ما ەكەن' دەپ الاڭداپ وتىرامىز. قازىر يتتەر تىم اگرەسسيۆتى", - دەپ جازعان جەلىدەگى قولدانۋشى.
"19-شاعىن اۋداندا قاپتاپ ءجۇر. تەك بالالار ەمەس، ەرەسەكتەردىڭ ءوزى قورقادى", - دەپ ارىزدارىن دا بىلدىرگەن.
"قازاقستان رەسپۋبليكاسىنىڭ جاڭا كونستيتۋتسياسىنىڭ جوباسىنىڭ 1-بابىندا "قازاقستان رەسپۋبليكاسى – دەموكراتيالىق، زايىرلى، قۇقىقتىق جانە الەۋمەتتىك مەملەكەت. مەملەكەتتىڭ ەڭ جوعارى قۇندىلىعى – ادام مەن ونىڭ ءومىرى، قۇقىقتارى مەن بوستاندىقتارى."- دەپ كورسەتىلگەنىن مەنەن جاقسى بىلەتىن شىعارسىزدار؟
ال ەندى كورەيىك سول مەملەكەتىمىزدىڭ ەڭ جوعارى قۇندىلىعىن جەرگىلىكتى اتقارۋشى بيلىك وكىلدەرى اكىمدەر قالاي قورعايتىنىن؟ سول قاڭعىعان يتتەرمەن قالاي زاڭ اياسىندا كۇرەسىندەرىڭىزدى؟
اكىم مىرزالار نەگە قاراعاندى قالاسىندا قاڭعىعان يتتەر ماسەلەسىن شەشۋگە نە كەدەرگى؟
مەنىڭ كورگەن اڭعار سماعۇل، ايسۇلتان جاقىپوۆ ازاماتتار وسى ماسەلەنى ايتۋداي اق ايتىپ، قوعام ءۇنىن اكىم مىرزالار سىزدەرگە جەتكىزگەنىمەن نەگە الدىن الۋ شارالارى جاسالمايدى.
ال ەندى كەلىپ قاڭعىعان يتتەر مەنىڭ باۋىرىمدى تىستەپ، ومىرىنە قاۋىپ توندىرگەندە ءبىر شارا قولداناتىن شىعارسىزدار؟" - دەپ جازدى ادىلەت جاعىپار.
