قاراعاندى قالاسىنا جاڭا اكىم تاعايىندالدى

2296
Adyrna.kz Telegram
فوتو: gov.kz
فوتو: gov.kz

قازاقستان پرەزيدەنت اكىمشىلىگىنىڭ جانە قالالىق ءماسليحات دەپۋتاتتارىنىڭ كەلىسىمى بويىنشا قاراعاندى قالاسىنىڭ اكىمى بولىپ مەيرام مۇراتۇلى كوجۋحوۆ تاعايىندالدى. بۇل تۋرالى قاراعاندى قالاسىنىڭ اكىمدىگى رەسمي سايتىندا جاريالادى، دەپ حابارلايدى “ادىرنا” ۇلتتىق پورتالى.

ۆەدومستۆونىڭ مالىمەتىنشە، ءوڭىر باسشىسى ەرماعانبەت بولەكپاەۆ قالالىق ءماسليحاتتىڭ كەزەكتەن تىس سەسسياسىنا قاتىسىپ، اكىم لاۋازىمىنا مەيرام كوجۋحوۆتىڭ كانديداتۋراسىن ۇسىنعان. دەپۋتاتتار ونى قولداعان.

"مەيرام مۇراتۇلى كوپ جىل بويى قاراعاندىدا جۇمىس ىستەدى. بارلىق ماسەلەمەن تانىس. ەڭ باستىسى، قالا تۇرعىندارى ونى جاقسى بىلەدى. جيناقتالعان تاجىريبە مەن ءبىلىم مەيرام مۇراتۇلىنا قالانىڭ الەۋمەتتىك-ەكونوميكالىق دامۋىندا ءوزىنىڭ الەۋەتىن ىسكە اسىرۋعا كومەكتەسەدى دەپ سەنەمىن", – دەيدى وبلىس اكىمى. سونداي-اق ەرماعانبەت بولەكپاەۆ جاڭا اكىمنىڭ باستى مىندەتى قاراعاندىلىقتاردىڭ ءومىرى ءۇشىن قولايلى جاعداي جاساۋ ەكەنىن اتاپ ءوتتى.

سونىمەن قاتار ول قالا باسشىسىنا وبلىس ورتالىعىن، ينفراقۇرىلىمدى دامىتۋدى جالعاستىرۋ جانە جىلىتۋ ماۋسىمىنىڭ ۇزدىكسىز ءوتۋىن قامتاماسىز ەتۋ مىندەتتەرىن جۇكتەدى. ايتا كەتەيىك، مەيرام كوجۋحوۆ 1972 جىلى دۇنيەگە كەلگەن. 2001 جىلدان باستاپ مەملەكەتتىك قىزمەتتە.

ساران مادەنيەت، جاستار ساياساتى، سپورت جانە تۋريزم ءبولىمىنىڭ باس مامانى، اقتاس كەنتىنىڭ اكىمى، ساران قالاسى اكىمىنىڭ ورىنباسارى، قاراعاندى قالاسى وكتيابر اۋدانىنىڭ اكىمى قىزمەتتەرىن اتقارعان. 2022 جىلدىڭ ءساۋىر ايىنان باستاپ وسى تاعايىنداۋعا دەيىن قاراعاندى قالاسى اكىمىنىڭ ورىنباسارى بولعان.

پىكىرلەر