فوتو: Supernova+
28-29 قازان كۇندەرى رەسەي اسكەرى ۋكراينانىڭ بىرنەشە قالاسى مەن وبلىسىنا سوققى جاسادى. ۋكراينا بيلىگىنىڭ مالىمەتىنشە, شابۋىلدار سالدارىنان كەمىندە 19 بەيبىت تۇرعىن قازا تاۋىپ، 40-تان استام ادام جارالانعان. قازا تاپقاندار اراسىندا بالالار دا بار، دەپ حابارلايدى "ادىرنا".
ەڭ اۋىر شابۋىلداردىڭ ءبىرى دنەپر قالاسىنداعى تەمىرجول ۆوكزالىندا بولدى. درون جولاۋشىلار پويىزىنا سوعىلىپ، 14 ادام قازا تاپتى، تاعى 14 ادام جارالاندى. زارداپ شەككەندەردىڭ اراسىندا 11 جاستاعى بالا بار.
چەرنيگوۆتە ەكى 15 جاستاعى قىز كوز جۇمىپ، توعىز ادام جاراقات الدى. كرەمەنچۋك قالاسىندا درون تۇرعىن ۇيگە سوعىلىپ، ءۇش ادام قازا تاپتى، 19 ادام جارالاندى.
سونىمەن قاتار يزيۋمدە باسقارىلاتىن اۆيابومبالار بەس قاباتتى تۇرعىن ۇيگە ءتۇستى. ون ادام زارداپ شەگىپ، ءۇيىندى استىندا تاعى ءتورت ادام قالۋى مۇمكىن.
زاپوروجە، حاركوۆ، سۋمى جانە روۆنو وبلىستارىندا دا شابۋىلدار تىركەلدى. روۆنو وبلىسىندا ءبىر ادام قازا تاپسا، حاركوۆتە ءبىر تۇرعىن كوز جۇمدى. كيەۆ وبلىسىنداعى قۇس فابريكاسىندا ءورت شىعىپ، شامامەن 15 مىڭ قۇس قۇتقارىلدى.
ۋكراينا بيلىگىنىڭ دەرەگىنشە، دونەتسك وبلىسىنداعى بەلسەندى ۇرىس ايماعىندا ءالى دە 57 مىڭعا جۋىق بەيبىت تۇرعىن بار. ولاردىڭ 1,7 مىڭنان استامى – بالالار.
