بەلگىلى ماتەماتيك، فيزيكا-ماتەماتيكا عىلىمدارىنىڭ دوكتورى، پروفەسسور اسقار جۇمادىلداەۆ 70 جاسقا تولدى، دەپ حابارلايدى «ادىرنا» ءتىلشىسى.
مەرەيتوي اياسىندا كاسىپكەر جانىبەك جانىقۇلوۆ عالىمعا Hyundai Palisade اۆتوكولىگىن سىيلادى. بۇل تۋرالى سىرىمبەك تاۋ الەۋمەتتىك جەلىدەگى پاراقشاسىندا جازدى.
«قازاقتىڭ ءتىرى قازىناسىنىڭ ءبىرى، ارداقتى ۇستازىمىز اسقار سەرقۇلۇلى 70 جاسقا تولدى. وسى مەرەيتويىنا وراي ەرەكشە سىي جاسالدى. اعامىزدى مەرەيلى جاسىمەن شىن جۇرەكتەن قۇتتىقتايمىز! دەنىنە ساۋلىق، ۇزاق عۇمىر تىلەيمىز!»- دەدى كاسىپكەر.
اسقار جۇمادىلداەۆ 1956 جىلى قىزىلوردا وبلىسىنداعى شيەلى قىستاعىندا دۇنيەگە كەلگەن. ونىڭ نەگىزگى عىلىم-زەرتتەۋ ەڭبەكتەرى لي الگەبراسىنىڭ كوگومولوگيا تەورياسىنا ارنالعان. ول وڭ سيپاتتامالى لي الگەبراسىنىڭ كوگومولوگيالارى مەن دەفورماتسيالارىن جانە ولاردىڭ قولدانۋىن زەرتتەگەن. ۆەكتورلىق ءورىس الگەبراسىنىڭ بولشەكتەنبەيتىن كەڭەيۋىن ەسەپتەگەن. ءاسسوتسياتيۆتى ەمەس الگەبرانىڭ تەپە-تەڭدىكتەرىن تاپقان. جۇمادىلداەۆ گەرمانياداعى گامبۋرگ (1986), ميۋنحەن (1995 – 96), بيلەفەلد (1996 – 99) ۋنيۆەرسيتەتتەرىنىڭ پروفەسسورى بولعان. كەمبريدج ۋنيۆەرسيتەتىنىڭ جانىنداعى نيۋتون ينستيتۋتىندا (1997), ا.سالام اتىنداعى حالىقار تەوريالىق فيزيكا ورتالىعىندا (يتاليا، 1998, 2001), شۆەتسيا كورولدىك عىلىم اكادەمياسىنىڭ ميتتاگ-لەففلەر اتىنداعى ماتەماتيكا ينستيتۋتىندا (1998 – 99), فيلدس اتىنداعى ماتەماتيكا ينستيتۋتىندا (كانادا، 2001) قىزمەت اتقارىپ، لەكتسيالار وقىعان. گەرمانيانىڭ، اقش-تىڭ مەملەكەتتىك ستيپەنديالارىن، شۆەتسيا كورولدىك عىلىم اكادەمياسىنىڭ گرانتىن العان.
