تۇركىستان وبلىسىندا باستاۋىش سىنىپتىڭ باعدارلاماسىن ەركىن مەڭگەرگەن ءتورت جاسار بالا تۇرادى. ءالي ادامبەك ەسىمدى ءبۇلدىرشىن قۇرداستارى ءالىپبي جاتتاپ جۇرگەندە، كۇردەلى ەسەپتەردى وپ-وڭاي شىعارادى، دەپ حابارلايدى «ادىرنا» ءتىلشىسى 24.kz-كە سىلتەمە جاساپ.
ونىڭ بىلىمگە دەگەن قۇشتارلىعىن مەكتەپ ۇجىمى دا جوعارى باعالاپ، رەسمي تۇردە وقۋعا قابىلداعان.
«بايقاپ قاراساق، مەنىڭ وقۋشىلارىمنىڭ دەڭگەيىنەن جوعارى. ءۇش تاڭبالى سانداردى قوسىپ، ازايتىپ جاتىر. ەكى امالدى بەرىپ كوردىم. ونى شىعاردى. وقي الا ما ەكەن دەپ الىپپەنى بەرسەك، الىپپەنى دە وقىدى. ارىپتەردىڭ ءبارىن الفاۆيت بويىنشا توقتاماي 42 ءارىپتى ورنىن وزگەرتپەي ايتىپ بەرە الادى. جاتقا بىلەدى»،- دەيدى التىنتوبە اتىنداعى جالپى ورتا مەكتەبىنىڭ مۇعالىمى ءاليا مياتبەكوۆا.
ءاليدىڭ ەرەكشەلىگىن اتا-اناسى ەرتە اڭعارعان. ول نەبارى ەكى جاسىندا ءارىپ تانىپ، ءۇش جاسىندا سانداردى كوبەيتۋگە بەيىمدەلگەنىن ايتادى. وتباسىنداعى كەنجە ۇلدىڭ زەرەكتىگى اعالارىنىڭ ءۇي تاپسىرماسىنا كومەكتەسىپ وتىرعاندا بايقالعان.
ء«بىر كۇنى قاراسام، 3-سىنىپتاعى بالامنىڭ 105-ءشى ساباق دەگەن ماتەماتيكالىق جيناعى بار، سونىڭ ءبىر بەتىندەگى ءبىر تاڭبالى سانداردى قوسىپ الۋدىڭ ءبىر قاتارىن شىعارىپ تاستاپ، ەكىنشى قاتارىن جازىپ جاتىر عوي. ۇيىقتار الدىندا ۇنەمى ەسەپ ايتايىقشى دەيدى. سولاي كۇندەلىكتى جارتى ساعات ەسەپ ايتامىز. جاسى ەندى ۇشتەن اسقان»،- دەيدى بالانىڭ اناسى نۇرگۇل مىرزاعالي.
بۇگىندە ءتورت جاستاعى ءالي مەكتەپالدى دايارلىق توبىن ءتامامداپ، جوعارى سىنىپ وقۋشىلارىمەن جارىسىپ ەسەپ شىعارۋعا كوشكەن. العىر بالانىڭ قابىلەتى مۇنىمەن شەكتەلمەيدى. ءالي قازاق ءالىپبيىن تولىق مەڭگەرىپ قانا قويماي، قازىرگى تاڭدا اعىلشىن تىلىندە وقىپ-جازۋعا دا ەرەكشە ىقىلاس تانىتىپ ءجۇر.
