تۇركىستان قالاسى رەسمي تۇردە تۇركى الەمىنىڭ تۋريستىك استاناسى اتاندى، دەپ حابارلايدى "ادىرنا" ءتىلشىسى تۇركىستان وبلىسى اكىمدىگىنىڭ ءباسپاسوز قىزمەتىنە سىلتەمە جاساپ.
ازەربايجان رەسپۋبليكاسىندا «شاماحي — تۇركى الەمىنىڭ تۋريزم استاناسى 2023» ءىس-شاراسىنىڭ جابىلۋ ءراسىمى ءوتتى. تۇركى مەملەكەتتەرى ۇيىمى (تمۇ) تاراپىنان بەرىلەتىن رەسمي مارتەبەنى الۋ سالتاناتىنا تۇركىستان وڭىرىنەن ارنايى دەلەگاتسيا قاتىسقان بولاتىن.
تۇركى مەملەكەتتەرى ۇيىمىنىڭ تۋريزم سالاسى بويىنشا جيىندا تۇركىستان وبلىسى اكىمى دارحان ساتىبالدى تاريحتان كەلەشەككە باعىت العان تۇركى حالىقتارىنىڭ مادەني جانە رۋحاني مەكەنىنىڭ جىلدان جىلعا تۇرلەنىپ جاتقانىن، مەملەكەت باسشىسى قاسىم-جومارت توقاەۆ تۇركىستان قالاسىنا ەرەكشە مارتەبە بەرۋدى تاپسىرعانىن اتاپ ءوتتى. وبلىس باسشىسى كەڭەستىڭ VIII بەيرەسمي سامميتىندە تۇركىستاندى تۇركى الەمىنىڭ رۋحاني استاناسى دەپ اتاۋ تۋرالى تاراپتار قول قويعان دەكلاراتسيانىڭ ماڭىزى جوعارى ەكەنىن جەتكىزگەن ەدى.
بيىل تۇركىستان — تۇركى مەملەكەتتەرىنىڭ 2024 جىلعى تۋريستىك استاناسى اتاندى. سوعان وراي وبلىستىق قوعامدىق دامۋ باسقارماسىنىڭ باسشىسى قۋانىشتى حابارمەن ءبولىستى.
«قازان ايىندا تۇركىستاندا وتكەن تۇركى مەملەكەتتەرى ۇيىمى ەلدەرىندەگى تۋريزم ماسەلەلەرىنە جاۋاپتى مينيسترلەردىڭ VIII وتىرىسىندا تۇركىستان — تۇركى مەملەكەتتەرىنىڭ 2024 جىلعى تۋريستىك استاناسى اتاندى. بۇگىنگى سالتاناتتى جيىنعا وسى مارتەبەنى شاماحيدان تۇركىستانعا قابىلداپ الۋعا كەلىپ وتىرمىز. ءبىز ءۇشىن تاريحي ءارى قۋانىشتى ءسات. بۇل شەشىم — تۇركىتىلدەس ەلدەردىڭ تۋريزم باعىتىنداعى قارىم-قاتىناسىن نىعايتۋعا ايرىقشا سەرپىن بەرەدى. تۇركىستان وبلىسىندا تاريحي-تانىمدىق تۋريزمىنەن بولەك، ەمدىك-ساۋىقتىرۋ جانە ەكولوگيالىق تۋريزم باعىتىمەن سىزدەردى تانىسۋعا شاقىرامىز. تاريحتان كەلەشەككە باعىت العان تۇركىستاندا، ياعني اتاجۇرتتا اسىعا كۇتەمىز!» — دەدى ەرلان كۇزەمباەۆ.
