"كۇندەلىكتى" تولتىرۋ ءۇشىن كورشى اۋىل مەن تاۋ-تاستى ارالاعان ۇستازدار ماسەلەسى شەشىلەتىنى حابارلاندى. تۇركىستان وبلىسى، قازىعۇرت اۋدانى، اققۇم اۋىلىندا ينتەرنەت ساپاسى جاقساراتىن بولدى، دەپ حابارلايدى "ادىرنا" ۇلتتىق پورتالى.
تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى بۇل جاعدايعا قاتىستى پىكىر ءبىلدىردى. ولاردىڭ مالىمەتىنشە، "ترانستەلەكوم" كومپانياسىمەن بىرگە اتالعان اۋىلداعى بايلانىس جانە ينتەرنەت ساپاسىن جاقسارتۋدى قولعا الادى.
«ترانستەلەكوم» اق تۇركىستان وبلىسىنىڭ اققۇم اۋىلىندا سەكۋندىنا 20 مبيت-كە دەيىن ينتەرنەتپەن جانە راديورەلەلىك كوپىر تەحنولوگياسى بويىنشا ءليميتسىز ترافيكپەن قامتاماسىز ەتۋ جۇمىستارىن جۇرگىزەدى»، - دەپ اتاپ ءوتتى تسيفرلىق دامۋ مينيسترلىگىنەن.
ايتا كەتەرلىگى، تسيفرلىق دامۋ مينيسترلىگى بايلانىس سالاسىندا «قولجەتىمدى ينتەرنەت» ۇلتتىق جوباسىن ازىرلەدى. اتالعان جوبا اياسىندا اققۇم اۋىلىن قوسا العاندا 3 مىڭنان استام ەلدى مەكەندى تالشىقتى-وپتيكالىق بايلانىس جەلىسى قىزمەتىمەن قامتاماسىز ەتۋ جونىندەگى ءىس-شارا قاراستىرىلعان.
بۇعان دەيىن تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسينگە قازاقستانداعى ينتەرنەت پەن بايلانىس ساپاسى تۋرالى بىرنەشە ساۋال قويىلعان بولاتىن. استانا مەن توكيوداعى ينتەرنەت جىلدامدىعىن سالىستىرۋدان باس تارتقان مينيسترگە تاعى دا بىرنەشە سۇراق قويىلعان بولاتىن. ال مينيستر 5G بايلانىسى اۋىلدىق جەرلەرگە ەنىپ جاتقان جوق ەكەنىن ايتادى. بازالىق ستانتسيانى ورناتۋ ازىرگە تەك ماڭىزدى قالالار مەن وبلىستاردا جۇزەگە اسپاق.
ەسكە سالا كەتەيىك, ينتەرنەت سالعان سارساڭعا قاتىستى اۋىلداعى باستاۋىش سىنىپ مۇعالىمى قۇرالاي قوجابەرگەنوۆا:
- ...جۇرت كۇلەدى اققۇمنىڭ مۇعالىمدەرى سىعان سياقتى جۇرەدى نەمەسە قىدىرىپ جۇرەدى دەپ. "بۇلارعا راحات" دەيدى. بىزگە راحات ەمەس. قاراۋسىز بالا-شاعا. مەكتەپتە وتىرساق جاقسى ەمەس پە، كوپ نارسە ىستەيمىز عوي. ۋاقىتتىڭ ءبارى جولعا كەتەدى. قايتاردا جاياۋ-جالپى قايتامىز. ءبىز مەكتەپتە نە ۇيدە ەمەسپىز. اققۇم مۇعالىمدەرى سىعاندار سياقتى دەپ كەلەكەلەيدى،نەمەسە ءبىزدىڭ قالاي دەمالىپ جاتقانىمىزدى قاراڭىزدار دەيدى. بىراق كۇلۋگە دە ۋاقىتىمىز جوق، - دەگەن ەدى.
"ادىرنا" ۇلتتىق پورتالى
