تۇركىستان وبلىسىندا مۇعالىم سوت عيماراتىندا وزىنە قول جۇمساماق بولدى
تۇركىستان وبلىسى ورداباسى اۋدانىندا مۇعالىم سوتتا وزىنە قول جۇمساۋعا ارەكەتتەنگەن، دەپ حابارلايدى "ادىرنا".
وقيعا اۋداندىق سوتتا اكىمشىلىك قاماۋعا الۋ تۋرالى شەشىم شىققاننان كەيىن بولعان.
الدىن الا مالىمەت بويىنشا، زارداپ شەككەن ازامات – 24 جىل ەڭبەك ءوتىلى بار پەداگوگ ح. ەرىمبەتوۆ. ول 2026 جىلدىڭ قاڭتار ايىندا م.ح. دۋلاتي اتىنداعى مەكتەپ اكىمشىلىگىنىڭ شەشىمىمەن ەڭبەك كودەكسىنىڭ 52-بابى نەگىزىندە قىزمەتىنەن بوساتىلعان.
مۇعالىم بۇل شەشىممەن كەلىسپەي، ەڭبەك ينسپەكتسياسىنا شاعىمدانعان. تەكسەرۋ بارىسىندا جۇمىس بەرۋشى تاراپىنان زاڭبۇزۋشىلىقتار انىقتالىپ، ونى قىزمەتىنە قايتا ورنالاستىرۋ تۋرالى ەكى رەت نۇسقاما بەرىلگەنىمەن، مەكتەپ تاراپىنان ول ورىندالماعان.
كەيىن پەداگوگ سوتقا جۇگىنىپ، ەڭبەك داۋى بويىنشا ءىس بىرنەشە اي بويى قارالعان. وسى ۋاقىت ارالىعىندا التى بالانىڭ اكەسى جۇمىسسىز قالىپ، بانك شوتتارىنىڭ بۇعاتتالعانى ايتىلدى.
28 مامىرداعى سوت وتىرىسىندا ول سۋدياعا قارسىلىق ءبىلدىرىپ، سوت زالىنان شىعىپ كەتكەن. ال 3 ماۋسىمدا سوت ونى تالاپتى ورىنداماعانى ءۇشىن بەس تاۋلىككە اكىمشىلىك قاماۋعا الۋ تۋرالى شەشىم شىعارعان.
ۇكىم جاريالانعاننان كەيىن ەر ادام وزىنە جاراقات سالعان. قازىرگى ۋاقىتتا ول ورداباسى اۋداندىق ورتالىق اۋرۋحاناسىندا ەم قابىلداپ جاتىر.
وقيعاعا قاتىستى رەسمي ورگاندار ازىرگە تۇسىنىكتەمە بەرگەن جوق.
