مەملەكەت باسشىسى Mars كومپانياسىنىڭ باس اتقارۋشى ديرەكتورى پول ۆايراۋحتى قابىلدادى، دەپ حابارلايدى "ادىرنا" ۇلتتىق پورتالى.
كەزدەسۋ بارىسىندا قازاقستاندا جاڭا وندىرىستىك جوبانى ىسكە اسىرۋ ماسەلەسى تالقىلاندى.
پرەزيدەنت قازاقستاننىڭ اۋىل شارۋاشىلىعى مينيسترلىگى مەن Mars كومپانياسى اراسىندا جالپى قۇنى شامامەن 180 ميلليون دوللار بولاتىن ينۆەستيتسيالىق كەلىسىم جاسالعانىن اتاپ ءوتتى. ونىڭ ايتۋىنشا، بۇل كەلىسىم قازاقستان مەن اقش اراسىنداعى ستراتەگيالىق سەرىكتەستىكتىڭ جاڭا كەزەڭىن بىلدىرەدى.
جوبا اياسىندا الاتاۋ قالاسىندا ءۇي جانۋارلارىنا ارنالعان ازىق وندىرەتىن زاماناۋي زاۋىت سالۋ جوسپارلانىپ وتىر. جاڭا ءوندىرىس ورنى اگروونەركاسىپ سالاسىنداعى شيكىزاتتى تەرەڭ وڭدەۋگە مۇمكىندىك بەرىپ، قوسىلعان قۇنى جوعارى ءونىم شىعارۋعا جول اشادى.
ءوز كەزەگىندە پول ۆايراۋح مەملەكەت باسشىسىنا كورسەتىلگەن قولداۋ ءۇشىن العىس ءبىلدىردى. ونىڭ سوزىنشە، بۇل جوبا كومپانيانىڭ وندىرىستىك الەۋەتىن كەڭەيتىپ، ورتالىق ازيا مەن كورشىلەس نارىقتارعا ءونىم جەتكىزۋ كولەمىن ارتتىرۋعا ىقپال ەتەدى.
