پرەزيدەنت قاسىم-جومارت توقاەۆ قىتايدىڭ «سينحۋا» اگەنتتىگىنە بەرگەن سۇحباتىندا Alatau City جوباسىنىڭ ستراتەگيالىق ماڭىزىنا توقتالدى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ ايتۋىنشا، جوبا جاڭا ەكونوميكالىق جانە تەحنولوگيالىق ورتانى قالىپتاستىرۋعا باعىتتالعان.
«Alatau City جوباسىنا ەرەكشە كوڭىل ءبولىپ وتىرمىز. بۇل – بىرەگەي ەكونوميكالىق جانە تەحنولوگيالىق ەكوجۇيە قالىپتاستىرۋعا باعىتتالعان باستاما. اتالعان جوبا اياسىندا تسيفرلىق شەشىمدەر مەن جاساندى ينتەللەكت قالا باسقارۋىنا، كولىك جۇيەسىنە، ەنەرگەتيكاعا، ءبىلىم بەرۋ سالاسىنا جانە قوعامدىق قىزمەتتەرگە كەڭىنەن ەنگىزىلەدى»، – دەدى پرەزيدەنت.
قاسىم-جومارت توقاەۆ قازاقستان جوبانى ىسكە اسىرۋ بارىسىندا حالىقارالىق تاجىريبەنى زەرتتەگەنىن اتاپ ءوتتى.
«ءبىز حالىقارالىق تاجىريبەنى مۇقيات زەرتتەدىك. سونىڭ ىشىندە بىرنەشە ونجىلدىق ىشىندە جوعارى تەحنولوگيالاردىڭ ءىرى ورتالىعىنا اينالعان شەنچجەن قالاسىنىڭ جەتىستىگى ەرەكشە نازار اۋدارتادى»، – دەدى ول.
پرەزيدەنتتىڭ سوزىنشە، قىتايلىق كومپانيالار قازاقستانداعى جوعارى تەحنولوگيالىق باستامالاردى جۇزەگە اسىرۋعا بەلسەندى قاتىسا الادى.
«قىتاي كومپانيالارىنىڭ قازاقستانداعى وسىنداي جوبالاردى جۇزەگە اسىرۋعا ەلەۋلى ۇلەس قوساتىنىنا سەنەمىن. الداعى جىلدارى ەكى ەل ماڭگى ءارى جان-جاقتى ستراتەگيالىق ارىپتەستىكتىڭ جاڭا جوعارى تەحنولوگيالىق باعىتىن قالىپتاستىرا الادى دەپ كامىل سەنەمىن»، – دەدى مەملەكەت باسشىسى.
ودان بولەك، قاسىم-جومارت توقاەۆ بيىل الماتىدا وتەتىن ماڭىزدى ەكونوميكالىق ءىس-شاراعا نازار اۋداردى.
«25 قىركۇيەكتە الماتى قالاسىندا وتەتىن «قازاقستان – قىتاي» ينۆەستيتسيالىق فورۋمىن ەرەكشە اتاپ وتكىم كەلەدى. جاڭا ەكونوميكالىق جانە ينۆەستيتسيالىق جوبالاردى ىسكە قوسۋعا ارنالعان ماڭىزدى الاڭعا اينالاتىن بۇل فورۋمعا قاتىسۋدى جوسپارلاپ وتىرمىن»، – دەدى ول.
