توو «ASIA FERROALLOYS» زاۋىتىنداعى جۇمىسشىلار جالاقىنى كوتەرۋدى تالاپ ەتتى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
2024 جىلعى 20 جەلتوقسان كۇنى كەشكى ساعات 21:10 شاماسىندا توو «ASIA FERROALLOYS» كاسىپورنىنىڭ №9 تسەحىنىڭ شامامەن تۇنگى اۋىسىمنىڭ 40 جۇمىسشىسى جالاقىنى كوتەرۋ تۋرالى تالاپتارىن باسشىلىققا جەتكىزدى. باسشىلىقتىڭ بۇل تالاپتى قابىلداماۋىنا بايلانىستى 20 جۇمىسشى جۇمىسىن توقتاتىپ، نارازىلىق بىلدىرگەن.
وقيعا ورنىنا جەرگىلىكتى اتقارۋشى ورگاندار مەن قۇقىق قورعاۋ ورگاندارىنىڭ وكىلدەرى كەلىپ، جۇمىسشىلارمەن كەلىسسوزدەر جۇرگىزگەنىن حابارلادى. جۇمىسشىلار ارنايى باستاماشىل توپ قۇرىپ، باسشىلىققا جازباشا ءوتىنىش دايىنداۋدى ۇسىندى. توپ مۇشەلەرى جالاقىنى 50%-عا كوتەرۋ تۋرالى تالاپ جازىلعان حات دايىنداپ، ونى رەسمي تۇردە تىركەدى.
ال كاسىپورىن باسشىلىعى دۇيسەنبى كۇنى رەسمي جاۋاپ بەرۋگە ۋادە ەتتى. وسىدان كەيىن جۇمىسشىلار زاۋىت اۋماعىنان شىعىپ، اۋىسىمعا جاۋاپتى قىزمەتكەرلەر جۇمىستارىنا قايتا كىرىستى.
21 جەلتوقساندا تاڭەرتەڭ جاعداي قايتالاندى. ساعات 08:00-دە №9 تسەحتىڭ ءبىرىنشى اۋىسىمى جۇمىسىن باستادى، الايدا از ۋاقىت وتكەن سوڭ 35 قىزمەتكەر جۇمىستى جالعاستىرۋدان باس تارتىپ، حاتقا جاۋاپ كۇتۋ ءۇشىن ۇيلەرىنە قايتتى.
بۇل جاعداي زاۋىتتىڭ باسقا بولىمشەلەرىنىڭ جۇمىسىنا اسەر ەتكەن جوق، ال قوعامدىق ءتارتىپ زاۋىت اۋماعىندا ساقتالىپ وتىر. كاسىپورىن باسشىلىعى ماسەلەنى شەشۋ جۇمىستارىن جالعاستىراتىنىن مالىمدەدى.
ەسكە سالا كەتەيىك، پرەزيدەنت قاسىم-جومارت توقاەۆ 2022 جىلدىڭ 2 قىركۇيەگىندەگى جولداۋىندا نىعماتۋليندەرگە قاتاڭ ەسكەرتۋ جاساعان بولاتىن.
ەستەرىڭىزگە سالا كەتەيىك، 20 شىلدەدە YDD Corporation فەرروقورىتپا زاۋىتىندا توتەنشە جاعداي ورىن العان بولاتىن.
