ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي مەملەكەت باسشىسى قاسىم-جومارت توقاەۆ ەل استاناسى ماڭىنداعى الجير مەموريالدى-مۇراجاي كەشەنىندە ءسوز سويلەپ، وتكەن زۇلمات جىلداردىڭ اۋىر مۇراسىن ۇمىتپاۋ كەرەكتىگىن اتاپ ءوتتى، دەپ حابارلايدى "ادىرنا" ۇلتتىق پورتالى.
پرەزيدەنت ءوز سوزىندە الجير-دە جازىقسىز جازاعا تارتىلعان 8 مىڭعا جۋىق ايەلدىڭ تاعدىرى تۋرالى ايتىپ، ولاردىڭ اراسىندا قازاقتىڭ بەتكەۇستار قايراتكەرلەرىنىڭ جۇبايلارى بولعانىن ەسكە سالدى.
"الجير ازابىن كورگەن جانداردىڭ ۇرپاقتارى قازىر ورتامىزدا وتىر. بۇل – ءبىزدىڭ ۇلتتىق تاريحىمىزدىڭ ەڭ قاسىرەتتى بەتتەرى. ساياسي قۋعىن-سۇرگىن – تەك قازاق حالقىنىڭ عانا ەمەس، بارلىق ەتنوستاردىڭ باسىنا تۇسكەن ناۋبەت", – دەدى مەملەكەت باسشىسى.
پرەزيدەنت سوڭعى جىلدارى ساياسي قۋعىن-سۇرگىن قۇرباندارىن تولىق اقتاۋ باعىتىندا اۋقىمدى جۇمىس اتقارىلعانىن مالىمدەدى. مەملەكەتتىك كوميسسيانىڭ ءۇش جىلدىق ەڭبەگى ناتيجەسىندە 300 مىڭنان استام ازامات اقتالدى، ەكى جارىم ميلليوننان استام قۇجاتتىڭ قۇپيا بەلگىسى الىندى.
"كوميسسيا زەرتتەگەن دەرەكتەر نەگىزىندە 72 تومدىق قۇجاتتار جيناعى جارىققا شىقتى. بۇل – بۇرىن-سوڭدى بولماعان عىلىمي جۇمىس. ەڭبەگى سىڭگەن زەرتتەۋشىلەر مىندەتتى تۇردە ماراپاتتالادى", – دەدى توقاەۆ.
سونداي-اق، پرەزيدەنت ءارحيۆى جانىنان ارنايى زەرتتەۋ ورتالىعى قۇرىلعانى، وعان 700 مىڭعا جۋىق بۇرىنعى قۇپيا قۇجاتتار تاپسىرىلعانى بەلگىلى بولدى.
پرەزيدەنت تاريحتى ساياسي قۇرالعا اينالدىرۋعا جول بەرىلمەيتىنىن اتاپ ءوتتى.
"ميلليونداعان ادامنىڭ توتاليتاريزم قۇربانى بولعانىن جادىمىزدا ساقتاۋ – ءبىزدىڭ قاستەرلى بورىشىمىز. تاريحتى بۇرمالاپ، زۇلىم ساياساتتى اقتاۋعا بولمايدى", – دەدى ول.
ءسوز سوڭىندا مەملەكەت باسشىسى جاستاردى وتكەننەن ساباق الۋعا، ۇلتتىق تاريحتى تەرەڭ تۇسىنۋگە شاقىردى.
ۇقساس جاڭالىقتار
