وبلىس اكىمى نۇرلىبەك نالىباەۆتىڭ قاتىسۋىمەن سابالاق ەلدى مەكەنىنە گاز قوسۋ ءراسىمى ءوتتى. وعان پارلامەنت ءماجىلىسىنىڭ دەپۋتاتتارى مۇرات ابەنوۆ، مارحابات جايىمبەتوۆ،مۇرات ەرگەشباەۆ، قۇقىق قورعاۋ ورگاندارىنىڭ ءبىرىنشى باسشىلارى، ءماسليحات دەپۋتاتتارى، زيالى قاۋىم وكىلدەرى مەن ەل اعالارى ارنايى قاتىستى.
ايماق باسشىسى تۇرعىنداردى كوپتەن كۇتكەن يگىلىكتىڭ ىسكە اسۋىمەن قۇتتىقتادى.
«مەملەكەت باسشىمىز قاسىم-جومارتكەمەلۇلىقالامىزدا وتكەن ۇلتتىق قۇرىلتايدا: «سوڭعى جىلدارى قىزىلوردا وبلىسى زامان تالابىنا ساي ءوسىپ-وركەندەپ جاتىر» دەپ، ايماعىمىزدىڭ بارلىق سالادا قارقىندى دامىعانىن ەرەكشە اتاپ ءوتتى. Cىر وڭىرىندە اتقارىلعان جۇمىستارعا وڭ باعاسىن بەردى.
تاريحي ميسسياسى ماڭىزدى جيىندا مەملەكەت باسشىمىز قىزىلوردا قالاسىندا 300 ورىندىق كوپبەيىندى اۋرۋحانا قۇرىلىسى باستالعانىن، الداعى ۋاقىتتا 500 ورىندىق ەمحانا مەن 200 ورىندىق پەرزەنتحانا سالىناتىنىن، جاڭا دراما تەاتر مەن زاماناۋي پرەزيدەنتتىك كىتاپحانا قۇرىلىسى باستالاتىنىن جاريالادى.«باتىس ەۋروپا – باتىس قىتاي» حالىقارالىق ءاۆتودالىزىنىڭ قىزىلوردا – اقتوبە باعىتىنداعى جولىن ءتورت جولاقتى ەتىپ كەڭەيتۋ جوباسى، «بەينەۋ – سەكسەۋىل» جولىنىڭ قۇرىلىسى بيىل قولعا الىناتىنىن ايتتى. بۇل – مەملەكەت باسشىمىزدىڭ سىر جۇرتشىلىعىنا ىستىق ىقىلاسى، تۇرعىندارىمىزدىڭ بەكەم بىرلىگى مەن تاتۋ تىرلىگىنىڭ ناتيجەسى!
حالقىمىزدا «مۇراتى ءبىردىڭ قۋاتى ءبىر» دەگەن ءسوز بار. اۋىلدىڭ دامۋى، كەلەشەگى سىزدەرگە، تۇرعىنداردىڭ ەڭبەكقورلىعىمەن اۋىزبىرلىگىنە بايلانىستى. سابالاققا قوسىلعان كوگىلدىر وتىن حالىقتىڭ تۇرمىس ساپاسىن ارتتىرىپ، الەۋمەتتىك جاعدايىن جاقسارتۋعا وڭ اسەر ەتەدى دەپ سەنەمىز!»، – دەدى ن.نالىباەۆ.
راسىمدە ايماقتىڭ الەۋمەتتىك-ەكونوميكالىق دامۋىنا ۇلەس قوسقان تۇرعىندار جانە مەردىگەر مەكەمە قىزمەتكەرلەرى وبلىس اكىمىنىڭ العىس حاتىمەن ماراپاتتالدى. پارلامەنت ءماجىلىسىنىڭ دەپۋتاتتارى مۇرات ابدۋلاميتۇلى، مارحابات جايىمبەتۇلى، مۇرات نالقوجاۇلى قۇتتىقتاۋ ءسوز سويلەدى. قىزىلوردا قالاسىنىڭ قۇرمەتتى ازاماتى سايلاۋباي ابىشەۆ باتاسىن بەردى.
ايتا كەتەيىك، قىزىلوردا قالاسىندا 80-گە جۋىق ساياجاي بار، ونىڭ 10-عا جۋىعىندا حالىق تىعىز قونىستانعان. وسىعان بايلانىستى باس جوسپارعا وزگەرىستەر ەنگىزىلىپ، بىرقاتار ساياجايعا «تۇرعىن ءۇي اۋماعى» مارتەبەسى بەرىلدى.
سابالاق ساياجايى قالا شەكاراسىنا ەنگىزىلىپ، ينفراقۇرىلىم جەتكىزۋگە مۇمكىندىك جاسالدى. سوڭعى ءتورت جىلدا بۇل اۋماققا 6 ملرد تەڭگەدەن استام قارجى ءبولىنىپ، 22 شاقىرىم اۋىز سۋ ماگيسترالى تارتىلدى. سۋ مۇناراسى ورناتىلىپ، ەلەكتر جەلىسى جۇرگىزىلدى، 20-عا جۋىق كوشەگە ورتاشا جوندەۋ جاسالدى.
سونىمەن قاتار، مەملەكەت جانە قوعام قايراتكەرى مۇرات باقتيارۇلى بيزنەستىڭ الەۋمەتتىك جاۋاپكەرشىلىگى اياسىندا «وردا سكۋل-2» جەكە مەكتەبىن مەملەكەت مەنشىگىنە بەردى.
سابالاققا 3,2 ملرد تەڭگەگە گاز تارتىلىپ، 1 694 ۇيگە كوگىلدىر وتىن قوسىلادى. الداعى ۋاقىتتا باسقا دا ساياجايلارعا كەزەڭ-كەزەڭىمەن ينفراقۇرىلىم جۇرگىزىلەدى.
