جامبىل وبلىسىندا پوليتسەيلەر جۇك كولىگىنىڭ جۇكتى جۇرگىزۋشىسىنە كومەكتەستى. ايەل قار باسقان تراسسادا تۇرىپ قالعان. بۇل تۋرالى ىشكى ىستەر مينيسترلىگى جازدى، دەپ حابارلايدى "ادىرنا".
قاتتى قار، بوران جانە كورىنۋدىڭ شەكتەلۋى وڭىردەگى جول جاعدايىن قيىنداتتى. پوليتسيا مالىمەتىنشە، جامبىل وبلىسىنىڭ تراسسالارىندا شامامەن 2200 كولىك جينالىپ قالعان. قاۋىپسىزدىكتى قامتاماسىز ەتۋ ءۇشىن تاۋلىك بويى جاعدايدى باقىلاپ، جۇرگىزۋشىلەرگە كومەك كورسەتىپ جۇرگەن 400-گە جۋىق پوليتسيا قىزمەتكەرى جۇمىلدىرىلعان.
جۋالى اۋدانىنداعى كۇيىك اسۋىندا پوليتسەيلەر سەگىز ايلىق جۇكتى، كوپبالالى انا وكسانا شەۆچۋككە كومەكتەسكەن. ايەلدىڭ جۇك كولىگى جۇرگىزۋشىسى بولىپ جۇمىس ىستەيتىنى جانە بوران سالدارىنان جولىن جالعاستىرا الماعانى انىقتالعان. قىزمەتكەرلەر وعان ىستىق شاي بەرىپ، تاماقپەن قامتاماسىز ەتىپ، جاقىن ماڭداعى جىلىتۋ پۋنكتىنە دەيىن جەتكىزىپ سالعان.
«ەكى كۇننەن بەرى وسىندا تۇرمىز. پوليتسيا قىزمەتكەرلەرى قولدان كەلگەننىڭ ءبارىن جاساپ جاتىر: كومەك ۇيىمداستىردى، جاعدايدى باقىلاپ، ءتارتىپتى قامتاماسىز ەتۋدە»، - دەدى جۇرگىزۋشى اسقار مۇسىلمانوۆ.
پوليتسيا جۇرگىزۋشىلەردى جولداعى جاعدايدى ەسكەرىپ، مۇمكىندىگىنشە الىس ساپارلاردان باس تارتۋعا شاقىردى.
