جامبىل وبلىسىنداعى جانارماي قۇيۋ بەكەتىندە رەسەيلىك بايكەرگە پىشاقپەن شابۋىل جاساعان قازاقستاندىق ازامات 11 جىل 3 ايعا باس بوستاندىعىنان ايىرىلدى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
سونىمەن قاتار، سوت ايىپتالۋشىدان 500 مىڭ تەڭگە (شامامەن 925 دوللار) مورالدىق شىعىن جانە 1,3 ميلليون تەڭگەدەن استام (شامامەن 2,4 مىڭ دوللار) ماتەريالدىق شىعىن ءوندىرىپ الۋعا شەشىم شىعاردى. ول سۋىق قارۋدى زاڭسىز الىپ ءجۇرۋ جانە بۇزاقىلىق نيەتپەن كىسى ولتىرۋگە وقتالۋ باپتارى بويىنشا ايىپتالدى.
تەرگەۋ مالىمەتىنشە، ءساۋىر ايىندا مەركى اۋدانىنداعى ازس-تە ايىپتالۋشى جابىرلەنۋشىمەن شىعابەرىستە سوقتىعىسىپ قالادى. بولماشى سەبەپپەن ەر ادام كىسى ءولتىرۋ نيەتىمەن جابىرلەنۋشىگە ارت جاعىنان كەلىپ، وعان پىشاقپەن ارقاسىنا جانە كەۋدە تۇسىنا ەكى رەت جاراقات سالعان.
كۋاگەرلەر شابۋىلداۋشىنى زالالسىزداندىرعان. جابىرلەنۋشى وقيعا ورنىنان قاشىپ ۇلگەرگەن، بۇل ايىپتالۋشىنىڭ قىلمىستىق ويىن اياقتاۋىنا كەدەرگى كەلتىرگەن.
Zakon.kz مالىمەتىنشە، سوت بارىسىندا ايىپتالۋشى وكىنىش بىلدىرگەنىمەن، كىناسىن مويىنداماعان. پروكۋرور وعان 15 جىل جازا سۇرادى، الايدا سوت بالالارىنىڭ كامەلەتكە تولماعانىن ەسكەرىپ، 11 جىل 3 اي مەرزىم بەردى. ۇكىم ءالى زاڭدى كۇشىنە ەنگەن جوق.
وقيعا 14 ساۋىردە بەلگىلى بولدى. ORDA.kz جازۋىنشا، جارالانعان ازامات – رەسەي ازاماتى، بايكەر. ول شىمكەنتتە موتوماۋسىمنىڭ اشىلۋىنان قايتىپ كەلە جاتقاندا موتوتسيكلىن جانارمايمەن تولتىرۋ ءۇشىن توقتاعان. دارىگەرلەر ونىڭ كەۋدە جانە بەل تۇسىنان پىشاقتالعانىن حابارلادى. كۇدىكتى وقيعا ورنىندا ۇستالىپ، ءىس ىشكى ىستەر ءمينيسترىنىڭ جەكە باقىلاۋىنا الىنعان.
