وبلىستا العاش رەت «امانات» پارتياسىنىڭ «TURGYNDAR AMANATY» جوباسى اياسىندا ء«ۇيدى باسقارۋ: جاۋاپكەرشىلىك، سەنىم، ناتيجە» اتتى فورۋم ءوتتى. جيىندا كوپقاباتتى تۇرعىن ۇيلەردى باسقارۋ، كوممۋنالدىق ينفراقۇرىلىمدى جاڭعىرتۋ، قاۋىپسىزدىك، تۇرعىندارمەن كەرى بايلانىستى كۇشەيتۋ جانە ميب پەن پيك جۇمىسىنىڭ تيىمدىلىگىن ارتتىرۋ ماسەلەلەرى تالقىلاندى.
فورۋم جۇمىسىنا «AMANAT» پارتياسىنىڭ حاتشىسى شولپان كارينوۆا، جامبىل وبلىسىنىڭ اكىمى ەربول قاراشوكەەۆ، قر پارلامەنتى ءماجىلىسىنىڭ دەپۋتاتى، «AMANAT» پارتياسى فراكتسياسىنىڭ مۇشەسى مۇقاش ەسكەندىروۆ، قر ونەركاسىپ جانە قۇرىلىس مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ ورىنباسارى قانات مىڭباەۆ، بارلىق دەڭگەيدەگى ءماسليحات دەپۋتاتتارى، مەملەكەتتىك جانە كوممۋنالدىق سالا وكىلدەرى، سونداي-اق وڭىردەگى ميب پەن پيك باسشىلارى قاتىستى.
جيىندا «AMANAT» پارتياسىنىڭ حاتشىسى شولپان كارينوۆا «TURGYNDAR AMANATY» جوباسى كوپپاتەرلى تۇرعىن ۇيلەرگە قاتىستى قوردالانعان ماسەلەلەردىڭ وڭ شەشىمىن تابۋعا باعىتتالعانىن ايتتى. جوبا اياسىندا ميب جانە پيك توراعالارىن وقىتۋ، دەپۋتاتتارمەن كەرى بايلانىستى كۇشەيتۋ، اكىمدىكتەرمەن بىرلەسكەن جۇمىستى جولعا قويۋ، اۋلالاردى اباتتاندىرۋ جانە «حالىق قاتىساتىن بيۋدجەت» تەتىگىن كەڭىنەن پايدالانۋ كوزدەلىپ وتىر. بۇعان دەيىن ەل اۋماعىنداعى بىرنەشە وڭىردە ءدال وسى باعىتتاعى جۇيەلى جۇمىس جۇرگىزىلدى. ماسەلەن، ءتورت ايدا استانادا اشىلعان جوبالىق فرونت-وفيستە 114 ءوتىنىش قابىلدانىپ، 67 ماسەلە بويىنشا كەڭەس بەرىلگەن.
– تاريف، اباتتاندىرۋ، جارىقتاندىرۋ، ليفت، ينتەرنەت پەن قاۋىپسىزدىك ماسەلەلەرى – تۇرعىندار ءۇشىن ەرەكشە ماڭىزعا يە. سوندىقتان كوپپاتەرلى تۇرعىن ۇيلەرگە قاتىستى وزەكتى ماسەلەلەردى جۇيەلى تۇردە شەشۋ ءۇشىن پارتيا باستاماسىمەن «TURGYNDAR AMANATY» جوباسى ىسكە قوسىلدى. وسى باعىتتاعى جۇمىس جۇيەلى تۇردە جۇرگىزىلۋدە. جىل باسىنان بەرى وسىنداي فورۋم-سەمينارلار ەلىمىزدىڭ 11 وڭىرىندە ءوتىپ، ءوز تيىمدىلىگىن كورسەتتى. وسى تاجىريبەنى ەسكەرە وتىرىپ، ءبىز بۇل جۇمىستى جامبىل وبلىسىندا جالعاستىرىپ وتىرمىز. بۇل رەتتە ءبىز وسي جانە كسك توراعالارىنىڭ قولداۋىنا ۇلكەن سەنىم ارتامىز. سەبەبى، سىزدەر – كۇن سايىن قالاداعى كوپپاتەرلى ءۇيدىڭ تۇرعىندارىمەن تىكەلەي بايلانىستا بولىپ، ولاردىڭ ناقتى سۇرانىستارىن جاقسى بىلەدى، حالىقتىڭ ءۇنىن جەرگىلىكتى بيلىككە جەتكىزەدى. سىزدەردىڭ تاجىريبەلەرىڭىز بەن كەرى بايلانىستارىڭىز ماڭىزدى ءرول اتقارادى، – دەدى شولپان كارينوۆا.
ءوز كەزەگىندە، جامبىل وبلىسىنىڭ اكىمى ەربول قاراشوكەەۆ كوپپاتەرلى تۇرعىن ۇيلەردى باسقارۋ ماسەلەلەرى الەۋمەتتىك تۇرعىدان اسا ماڭىزدى ەكەنىن تىلگە تيەك ەتىپ، حالىقتىڭ مەملەكەتتىك ورگاندارعا دەگەن سەنىم دەڭگەيىنە تىكەلەي اسەر ەتەتىنىن جەتكىزدى. ونىڭ ايتۋىنشا، باستى مىندەتتەردىڭ ءبىرى – كوپقاباتتى تۇرعىن ۇيلەردى باسقارۋ ىسىندەگى اشىقتىقتى كۇشەيتۋ، تۇرعىنداردىڭ سەنىمىن ارتتىرۋ جانە جاڭا باسقارۋ مادەنيەتىن قالىپتاستىرۋ.
– كوپپاتەرلى تۇرعىن ۇيلەردى باسقارۋ ماسەلەلەرى الەۋمەتتىك تۇرعىدان اسا ماڭىزدى بولىپ قالا بەرەدى جانە حالىقتىڭ مەملەكەتتىك ورگاندارعا دەگەن سەنىم دەڭگەيىنە تىكەلەي اسەر ەتەدى. وسى باعىتتا وبلىستا تۇرعىن ءۇي قورىن باسقارۋ سالاسىنداعى رەفورمالاردى جۇيەلى تۇردە ىسكە اسىرۋ ارقىلى، باسقارۋ سۋبەكتىلەرىنىڭ جاۋاپكەرشىلىگىن، اشىقتىعىن جانە قىزمەت تيىمدىلىگىن ارتتىرۋعا باعىتتالعان شارالار قابىلدانۋدا. وبلىس اۋماعىندا 2 101 كوپپاتەرلى تۇرعىن ءۇي بار. ونىڭ ىشىندە 1921 تۇرعىن ءۇي كوندومينيۋم نىسانى رەتىندە تىركەۋگە جاتادى، ونىڭ ىشىندە 1 811 ءۇي تىركەلگەن. جىل سوڭىنا دەيىن قالعان 110 كوپپاتەرلى تۇرعىن ءۇيدى تىركەۋ جوسپارلانۋدا، – دەدى ەربول قاراشوكەەۆ.
سونداي-اق، جيىندا قر پارلامەنتى ءماجىلىسىنىڭ دەپۋتاتى مۇقاش ەسكەندىروۆ ەلىمىزدە الەۋمەتتىك-ەكونوميكالىق دامۋ مەن تۇرعىنداردىڭ ءال-اۋقاتىن ارتتىرۋ باعىتىندا ماڭىزدى زاڭنامالىق شەشىمدەر قابىلدانىپ جاتقانىن اتاپ ءوتتى. ونىڭ ايتۋىنشا، وزەكتى ماسەلەلەر پارلامەنت ماجىلىسىندە تۇراقتى تۇردە قاراستىرىلۋدا.
سونىمەن قاتار، قر ونەركاسىپ جانە قۇرىلىس مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ ورىنباسارى قانات مىڭباەۆ كوپقاباتتى تۇرعىن ۇيلەردى باسقارۋ سالاسىنداعى قوردالانعان ماسەلەلەردى كوتەرىپ، ولاردى مينيسترلىك پەن «AMANAT» پارتياسىنىڭ «TURǴYNDAR AMANATY» جوباسى اياسىندا شەشۋ جولدارى قاراستىرىلىپ جاتقانىن جەتكىزدى.
بۇدان بولەك، تاراز قالاسىنىڭ اكىمى باقىتجان ورىنبەكوۆ وبلىس ورتالىعىندا تۇرعىن ءۇي-كوممۋنالدىق شارۋاشىلىق سالاسىن دامىتۋ جانە كوپپاتەرلى تۇرعىن ۇيلەردى باسقارۋ جۇيەسىن جەتىلدىرۋ باعىتىندا اتقارىلىپ جاتقان جۇمىستار تۋرالى باياندادى.
فورۋم بارىسىندا پاتەر يەلەرى كووپەراتيۆى اسسوتسياتسياسى توراعاسىنىڭ ورىنباسارى ەلەنا تسوي جانە «ەل امان-2023» باسقارۋشى كومپانياسىنىڭ ديرەكتورى ميراسحان داۋىلباەۆ ءسوز سويلەپ، «TURǴYNDAR AMANATY» جوباسى تۇرعىنداردىڭ مۇددەلەرىن قورعاۋعا، كوپپاتەرلى ۇيلەردى باسقارۋ جۇيەسىن جەتىلدىرۋگە جانە قوعامدىق باقىلاۋدى كۇشەيتۋگە باعىتتالعان ماڭىزدى باستاما ەكەنىن اتاپ ءوتتى. سونداي-اق، الداعى ۋاقىتتا پارتيامەن بىرلەسىپ جۇمىس جۇرگىزەتىندەرىن جەتكىزدى.
فورۋم جۇمىسى وقىتۋ سەمينارىمەن جالعاستى. وندا قاتىسۋشىلار پراكتيكالىق بىلىمدەرىن جەتىلدىرىپ، جاڭا داعدىلاردى مەڭگەرۋگە مۇمكىندىك الدى.
