قاڭتار ايىندا قازاقستاننىڭ ۇلتتىق قورىنان $350 ملن كولەمىندە شەتەل ۆاليۋتاسى ساتىلدى، ال اقپاندا بۇل كورسەتكىش $350–450 ملن ارالىعىندا بولۋى مۇمكىن. بۇل تۋرالى قازاقستان ۇلتتىق بانكى جاريالادى، دەپ حابارلايدى "ادىرنا".
ۇلتتىق بانكتىڭ مالىمەتىنشە، قاڭتار ايىنىڭ قورىتىندىسىندا تەڭگە باعامى 0,9%-عا نىعايىپ، ءبىر اقش دوللارى 501,24 تەڭگە دەڭگەيىندە قالىپتاستى. قازاقستان قور بيرجاسىنداعى ساۋدا-ساتتىقتىڭ ورتاشا تاۋلىكتىك كولەمى $359 ملن-نان $306 ملن-عا دەيىن تومەندەپ، ايلىق جالپى اينالىم $5,8 ملرد بولدى. ۇلتتىق قوردان ساتىلعان ۆاليۋتانىڭ ۇلەسى جالپى ساۋدا كولەمىنىڭ 6%-ىن نەمەسە تاۋلىگىنە $18,5 ملن-نان اسپايتىن مولشەردى قۇرادى.
كۇتىلەتىن فيسكالدىق تۇسىمدەردى ەسكەرە وتىرىپ، ۇكىمەتتىڭ الدىن الا وتىنىمدەرى بويىنشا اقپان ايىندا رەسپۋبليكالىق بيۋدجەتكە ترانسفەرت ءبولۋ ءۇشىن ۇلتتىق قوردان $350–450 ملن كولەمىندە ۆاليۋتا ساتۋ كوزدەلىپ وتىر.
سونىمەن قاتار قاڭتار ايىندا اينالاۋ وپەراتسياسى اياسىندا 350 ملرد تەڭگە الىندى. اقپان ايىندا دا وسى كولەمدە ۆاليۋتا ساتۋ جوسپارلانعان. ۇلتتىق بانك ۇلتتىق قور قاراجاتىمەن وپەراتسيالار جۇرگىزۋ كەزىندە نارىقتىق بەيتاراپتىق قاعيداتىن ساقتايتىنىن اتاپ ءوتتى.
رەتتەۋشى قاڭتار ايىندا ۆاليۋتالىق ينتەرۆەنتسيالار جۇرگىزىلمەگەنىن مالىمدەدى. ال كۆازيمەملەكەتتىك سەكتور تاراپىنان ۆاليۋتالىق ءتۇسىمنىڭ ءبىر بولىگىن مىندەتتى ساتۋ كولەمى شامامەن $206 ملن بولدى. بجزق اكتيۆتەرىنىڭ ۆاليۋتالىق ۇلەسى 40%-دان اسۋىنا بايلانىستى قاڭتاردا دا، اقپاندا دا زەينەتاقى اكتيۆتەرى ەسەبىنەن دوللار ساتىپ الۋ جوسپارلانباعان.
ۇلتتىق بانك تەڭگە باعامىنىڭ قىسقامەرزىمدى ديناميكاسى نارىقتاعى كۇتۋلەرگە، سالىق تولەمدەرىنە، جاھاندىق نارىقتاعى جاعداي مەن گەوساياسي احۋالعا تاۋەلدى بولاتىنىن اتاپ ءوتتى. سونىمەن قاتار التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى ايىرباس باعامى ساياساتى جالعاساتىنىن مالىمدەدى.
