بۇگىن، 2 اقپاندا پرەمەر-مينيستر ولجاس بەكتەنوۆ جاڭا كونستيتۋتسيا جوباسىن تالقىلاۋ اياسىندا اقپاراتتىق-ءتۇسىندىرۋ جۇمىستارىن ۇيىمداستىرۋ بويىنشا كەڭەس وتكىزدى. جيىنعا ۇكىمەت مۇشەلەرى مەن ءوڭىر اكىمدەرى قاتىستى، دەپ حابارلايدى «ادىرنا» ءتىلشىسى.
پرەمەر-مينيستر بارلىق دەڭگەيدەگى مينيسترلىكتەر مەن اكىمدىكتەرگە جاڭا كونستيتۋتسيا جوباسىن حالىققا جان-جاقتى ءتۇسىندىرۋ جۇمىستارىن كۇشەيتۋدى تاپسىردى.
«جالعان ءارى بۇرمالانعان اقپاراتتارمەن كۇرەسۋگە باسا نازار اۋدارىلدى. الەۋمەتتىك جەلىلەر مەن مەسسەندجەرلەردە شىندىققا جاناسپايتىن ارانداتۋشىلىق سيپاتتاعى جاريالانىمدار تىركەلۋدە. ىشكى ىستەر مينيسترلىگىنە «زاڭ مەن ءتارتىپ» قاعيداتىنا سايكەس، جالعان مالىمەتتەردى تاراتقانى ءۇشىن قاتاڭ قۇقىقتىق ارەكەت جانە جاۋاپكەرشىلىككە تارتۋدى قامتاماسىز ەتۋ تاپسىرىلدى»،-دەلىنگەن حابارلامادا.
ۇيلەستىرۋ پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆاعا جۇكتەلدى.
«اتا زاڭنىڭ جاڭا جوباسى – بولاشاققا باعدارلانعان پروگرەسسيۆتى قۇجات. وندا ادام جانە ونىڭ قۇقىقتارى مەن بوستاندىقتارى مەملەكەتتىڭ نەگىزگى باسىمدىعى رەتىندە جاريا ەتىلدى.
ءبىز كونستيتۋتسيا جوباسىندا پرەزيدەنت قاسىم-جومارت كەمەلۇلى توقاەۆتىڭ “زاڭ مەن ءتارتىپ” جاپپاي ۇستەمدىك قۇرعان، “ادىلەتتى ءارى تازا قازاقستاندى قۇرۋ” يدەياسى حالىقتىڭ كەڭ قولداۋىنا يە بولعانىن كورىپ وتىرمىز. جاۋاپتى ءارى جاسامپاز وتانشىلدىق يدەياسى باستى ورىنعا قويىلادى.
“كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت” تۇجىرىمداماسى ساياسي جۇيەنىڭ تۇراقتىلىعى مەن ساباقتاستىعىن ورنىقتىرا تۇسەدى»،-دەپ اتاپ ءوتتى ولجاس بەكتەنوۆ.
