جاڭا كونستيتۋتسيا جوباسىندا قازاقستاننىڭ زايىرلى سيپاتىن ايقىندايتىن نورما ەنگىزىلگەنى تۋرالى مالىمدەمە جاسالدى، دەپ حابارلايدى "ادىرنا" ۇلتتىق پورتالى.
بۇل تۋرالى مادەنيەت جانە اقپارات ءمينيسترى ايدا بالاەۆا حابارلادى.
ونىڭ ايتۋىنشا، قولدانىستاعى كونستيتۋتسيادا مەملەكەت دەموكراتيالىق، زايىرلى، قۇقىقتىق جانە الەۋمەتتىك دەپ كورسەتىلگەن بولسا، جاڭا جوبا بۇل قاعيداتتى دەربەس جانە اۋقىمدى تۇردە بەكىتەدى.
«زايىرلى مەملەكەت ءدىندى جوققا شىعارمايدى. جاڭا 7-باپتىڭ 1-تارماعىندا ء«دىن مەملەكەتتەن بولەك» دەپ ناقتى كورسەتىلگەن. مەملەكەتتىك ساياسات زاڭعا نەگىزدەلەدى، ەشبىر ءدىن مەملەكەتتىك نەمەسە مىندەتتى دەپ سانالمايدى. ازاماتتاردىڭ بارلىعى ءوز دىنىنە قاراماستان تەڭ قۇقىلى»، – دەدى ايدا بالاەۆا.
سونىمەن قاتار، ەلىمىزدە ءدىني بىرلەستىكتەردىڭ قىزمەتىن، قۇقىعى مەن جاۋاپكەرشىلىگىن رەتتەيتىن جەكە زاڭ قابىلدانباق. جوباعا ەنگىزىلگەن جاڭا باپتا ء«دىني ۇيىمداردىڭ قىزمەتى زاڭعا سايكەس جۇزەگە اسىرىلادى جانە كونستيتۋتسيالىق قۇرىلىس نەگىزدەرىن، ادامنىڭ قۇقىقتارى مەن بوستاندىقتارىن قورعاۋ، ۇلتتىق قاۋىپسىزدىكتى، قوعامدىق ءتارتىپتى، ازاماتتاردىڭ دەنساۋلىعى مەن قوعامنىڭ ادامگەرشىلىك بولمىسىن ساقتاۋ ماقساتىندا شەكتەلۋى مۇمكىن» دەلىنگەن.
