بۇگىن، 2 اقپاندا ەلىمىزدە ۇلتتىق باسىلىم كۇنى اتالىپ ءوتىلىپ جاتىر، دەپ حابارلايدى «ادىرنا» ءتىلشىسى.
ءدال وسى كۇنى ءاليحان بوكەيحانوۆ، احمەت بايتۇرسىنۇلى، مىرجاقىپ دۋلاتوۆ سەكىلدى ۇلت زيالىلارى نەگىزىن قالاعان "قازاق" گازەتىنىڭ العاشقى سانى جارىق كورگەن ەدى. بۇل وقيعا وتاندىق كاسىبي جۋرناليستيكانىڭ نەگىزىن قالاعان بولاتىن.
گازەت ورىنبور قالاسىندا 1915 جىلعا دەيىن اپتاسىنا ءبىر رەت، 1915 جىلدان اپتاسىنا ەكى رەت شىعىپ تۇرعان. تارالىمى — 3000, كەي جىلدارى 8000-عا دەيىن جەتكەن. باسىلىمدا حح عاسىردىڭ باسىنداعى قازاق ەلىنىڭ ساياسي-الەۋمەتتىك ءومىرىنىڭ ەڭ ءتۇيىندى ماسەلەلەرىنە، قازاق شارۋاشىلىعىنىڭ جاعدايىنا، جەر ماسەلەسىنە، باسقا ەلدەرمەن قارىم-قاتىناسىنا، وقۋ اعارتۋ، بالا تاربيەسىنە، ادەبيەت پەن مادەنيەت، ادەت-عۇرىپ، سالت-ساناعا، تاريح پەن شەجىرەگە ارنالعان قۇندى ماتەريالدار جاريالاندى.
پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا ءوز قۇتتىقتاۋىندا گازەت-جۋرنالداردىڭ اشىق قوعام قالىپتاستىرۋعا ماڭىزدى ۇلەس قوسىپ كەلە جاتقانىن اتاپ ءوتتى.
«قازىرگى ۋاقىتتا قازاقستاندىق باسىلىمدار اعا بۋىن قالىپتاستىرعان سول يگى ءداستۇردى لايىقتى جالعاستىرىپ وتىر. جاقىندا مەملەكەت باسشىسى «Turkistan» گازەتىنە بەرگەن سۇحباتىندا اتاپ وتكەندەي، ولار بۇگىندە «رەنەسسانس كەزەڭىنە» قادام باستى.
شىنىندا دا، بۇگىندە ۇلتتىق ءباسپاسوز ينتەرنەت پەن تسيفرلىق تەحنولوگيالاردىڭ ارقاسىندا اۋديتورياسىن كەڭەيتىپ، قايتا جاڭعىرۋ ءداۋىرىن باستان وتكەرۋدە. وسىلايشا، مەرزىمدى باسىلىمدار ەلدىڭ مەديا كەڭىستىگىندە ماڭىزدى ورنىن بەكەمدەي ءتۇستى. ۇلتتىق باسىلىمداردى قولداۋ مادەنيەت جانە اقپارات مينيسترلىگى قىزمەتىنىڭ باسىم باعىتتارىنىڭ ءبىرى بولىپ قالا بەرەدى»،-دەدى ول.
ايتا كەتەيىك، 1991 جىلى ەلىمىزدە بار-جوعى 10 رەسپۋبليكالىق گازەت پەن جۋرنال عانا شىقسا، 2026 جىلعى قاڭتار ايىنداعى دەرەككە سايكەس، قازاقستاندا 5 062 باق تىركەلگەن. ونىڭ ىشىندە 3 081-ءى مەرزىمدى باسىلىم: 1 932 گازەت پەن 1 149 جۋرنال.
