مادەنيەت جانە اقپارات ءمينيسترى ايدا بالاەۆا قازاق ادەبيەتىنىڭ كورنەكتى وكىلى، حالىق جازۋشىسى مۇحتار شاحانوۆتىڭ قايتىس بولۋىنا بايلانىستى كوڭىل ايتتى، دەپ حابارلايدى «ادىرنا» ءتىلشىسى.
ول مارقۇمنىڭ قازاق رۋحانياتىنداعى ورنى ەرەكشە ەكەنىن اتاپ ءوتتى.
«ارداقتى اعايىن! قازاق ادەبيەتىنىڭ ابىز اقساقالى، حالىق جازۋشىسى، قازاقستاننىڭ ەڭبەك ەرى، اياۋلى ازامات مۇحتار شاحانوۆ جارىق جالعاننان ءوتتى. بارشا قازاق ەلىنە، اعامىزدىڭ اۋلەتى مەن اعايىن-باۋىرلارىنا قايعىرا كوڭىل ايتامىن. مۇحتار شاحانوۆ شوقتىعى بيىك شىعارمالارى ارقىلى كوزى تىرىسىندە-اق كۇللى حالىقتىڭ ىستىق ىقىلاسىنا بولەنىپ، التى الاشتىڭ ارداقتىسىنا اينالعان ءبىرتۋار ازامات ەدى. ۇلت تاعدىرى سىنعا تۇسكەن ەلدىك ىستەردە ازاماتتىق ۇستانىمىنان تايماي، ەلجاندىلىق پەن پاراساتتىلىقتىڭ وزىق ۇلگىسىن كورسەتتى»،– دەپ جازدى مينيستر.
ايدا بالاەۆا اقىننىڭ ولەڭدەرى مەن قوعامدىق قىزمەتى ۇلتتىق رۋحانياتتىڭ قازىناسى بولىپ قالا بەرەتىنىن جەتكىزدى.
«قالامگەردىڭ ولەڭ الەمىنە ءورىستى ورنەك، جاڭاشا تىنىس اكەلگەن تاعىلىمى مول تۋىندىلارى رۋحانياتىمىزدىڭ قۇندى قازىناسى بولىپ قالا بەرەرى انىق. مۇحتار اعامىزدىڭ وتتى دا ويلى ولەڭدەرى، قايسار مىنەزى، ادىلەت جولىنداعى تاباندىلىعى مەن ەلدىك مۇددە الدىنداعى ادالدىعى جۇرت جادىندا ماڭگى ساقتالادى. اعامىزدىڭ جاتقان جەرى جارىق، توپىراعى تورقا بولسىن! رۋحى پەيىشتە شالقىسىن! اللا تاعالا ۇرپاقتارىنا ۇزاق عۇمىر بەرسىن! قوش بولىڭىز، ۇلتىمىزدىڭ ۇلى پەرزەنتى!»–دەدى ول.
