Bügın, 2 aqpanda elımızde Ūlttyq basylym künı atalyp ötılıp jatyr, dep habarlaidy «Adyrna» tılşısı.
Däl osy künı Älihan Bökeihanov, Ahmet Baitūrsynūly, Mırjaqyp Dulatov sekıldı ūlt ziialylary negızın qalaǧan "Qazaq" gazetınıŋ alǧaşqy sany jaryq körgen edı. Būl oqiǧa otandyq käsıbi jurnalistikanyŋ negızın qalaǧan bolatyn.
Gazet Orynbor qalasynda 1915 jylǧa deiın aptasyna bır ret, 1915 jyldan aptasyna ekı ret şyǧyp tūrǧan. Taralymy — 3000, kei jyldary 8000-ǧa deiın jetken. Basylymda HH ǧasyrdyŋ basyndaǧy qazaq elınıŋ saiasi-äleumettık ömırınıŋ eŋ tüiındı mäselelerıne, qazaq şaruaşylyǧynyŋ jaǧdaiyna, jer mäselesıne, basqa eldermen qarym-qatynasyna, oqu aǧartu, bala tärbiesıne, ädebiet pen mädeniet, ädet-ǧūryp, salt-sanaǧa, tarih pen şejırege arnalǧan qūndy materialdar jariialandy.
Premer-ministrdıŋ orynbasary – Mädeniet jäne aqparat ministrı Aida Balaeva öz qūttyqtauynda gazet-jurnaldardyŋ aşyq qoǧam qalyptastyruǧa maŋyzdy üles qosyp kele jatqanyn atap öttı.
«Qazırgı uaqytta qazaqstandyq basylymdar aǧa buyn qalyptastyrǧan sol igı dästürdı laiyqty jalǧastyryp otyr. Jaqynda Memleket basşysy «Turkistan» gazetıne bergen sūhbatynda atap ötkendei, olar bügınde «renessans kezeŋıne» qadam basty.
Şynynda da, bügınde ūlttyq baspasöz internet pen sifrlyq tehnologiialardyŋ arqasynda auditoriiasyn keŋeitıp, qaita jaŋǧyru däuırın bastan ötkerude. Osylaişa, merzımdı basylymdar eldıŋ media keŋıstıgınde maŋyzdy ornyn bekemdei tüstı. Ūlttyq basylymdardy qoldau Mädeniet jäne aqparat ministrlıgı qyzmetınıŋ basym baǧyttarynyŋ bırı bolyp qala beredı»,-dedı ol.
Aita keteiık, 1991 jyly elımızde bar-joǧy 10 respublikalyq gazet pen jurnal ǧana şyqsa, 2026 jylǧy qaŋtar aiyndaǧy derekke säikes, Qazaqstanda 5 062 BAQ tırkelgen. Onyŋ ışınde 3 081-ı merzımdı basylym: 1 932 gazet pen 1 149 jurnal.
