ەلىمىزدە 50-گە جۋىق گاز كەن ورنىن اۋكتسيونعا شىعارۋ جوسپارلانىپ وتىر. بۇل تۋرالى ەنەرگەتيكا ءمينيسترى ەرلان اقكەنجەنوۆ مالىمدەدى، دەپ حابارلايدى «ادىرنا» ءتىلشىسى.
ايتۋىنشا، بۇل شەشىم ينۆەستيتسيالىق قىزمەتتى جانداندىرۋ جانە گەولوگيالىق تاۋەكەلدەردى ءبولۋ ماقساتىندا قابىلدانعان.
«جەر قويناۋىنىڭ 50 جۋىق ۋچاسكەسىن ەلەكتروندىق اۋكتسيوندارعا شىعارۋ جوسپارلانۋدا. وسى ۋچاسكەلەردە گەولوگيالىق بارلاۋ جۇمىستارىن قارجىلاندىرۋ «QazaqGaz»، «سامۇرىق-قازىنا» جانە ينۆەستورلاردىڭ قاراجاتى ەسەبىنەن قامتاماسىز ەتىلەتىن بولادى»،-دەدى ول.
ودان بولەك، مينيستر گاز سالاسىنىڭ ۇزاقمەرزىمدى رەسۋرستىق بازاسىن نىعايتۋ جانە ەلدىڭ ەنەرگەتيكالىق قاۋىپسىزدىگىن قامتاماسىز ەتۋ ماقساتىندا «QazaqGaz» ۇلتتىق كومپانياسىمەن گەولوگيالىق بارلاۋ جۇمىستارىنىڭ كەشەندى باعدارلاماسىن جۇزەگە اسىرىپ جاتقانىن اتاپ ءوتتى.
قازىرگى ۋاقىتتا شامامەن 515 ملرد تەكشە مەتر گازدى الدىن الا رەسۋرستىق باعالاۋمەن جەر قويناۋىنىڭ 14 ۋچاسكەسىندە جۇمىستار جۇرگىزىلۋدە.
«ورتا مەرزىمدى پەرسپەكتيۆادا گەولوگيالىق بارلاۋ پورتفەلىن گازدىڭ جيىنتىق رەسۋرستىق باعاسى شامامەن 1,7 ترلن تەكشە مەتر بولاتىن 30 ۋچاسكەگە دەيىن كەڭەيتۋ كوزدەلەدى. بۇل ءوندىرىستى ۇلعايتۋ جانە بولجامدى ىشكى سۇرانىستى جابۋ ءۇشىن تۇراقتى نەگىز قالىپتاستىرۋعا مۇمكىندىك بەرەدى»،- اتاپ ءوتتى اقكەنجەنوۆ.
