ەنەرگەتيكا ءمينيسترى ۇكىمەتتەگى بريفينگتە رەسەيدەگى جانار-جاعارماي تاپشىلىعىن شەشۋگە قازاقستانداعى «كوندەنسات» شاعىن مۇناي وڭدەۋ زاۋىتىنىڭ قاتىساتىنىن ايتتى، دەپ حابارلايدى "ادىرنا".
ءمينيستردىڭ سوزىنشە، باتىس قازاقستانداعى كاسىپورىن رەسەي مۇنايىن وڭدەپ، وندىرىلگەن جانارمايدىڭ 70 پايىزىن رەسەيگە ەكسپورتتايدى. قالعان 30 پايىزى قازاقستاننىڭ ىشكى نارىعىندا قالادى.
«زاۋىت رەسەيگە جاقىن ورنالاسقان. ونى قازاقستاننىڭ نەمەسە رەسەيدىڭ ماگيسترالدىق قۇبىر جۇيەسىمەن بايلانىستىراتىن قۇبىر جوق. مۇناي تەمىرجول ارقىلى جەتكىزىلەدى. ەگەر قاتەلەسپەسەم، كومپانيانىڭ 50 پايىزى رەسەيلىك كومپانياعا تيەسىلى»، – دەدى ەرلان اقكەنجەنوۆ.
ونىڭ ايتۋىنشا، قازاقستاننىڭ ەنەرگەتيكا مينيسترلىگىنە رەسەي تاراپىنان زاۋىتتى رەسەيلىك مۇنايمەن قامتاماسىز ەتۋ جونىندە رەسمي حات كەلگەن. مينيستر بۇل كەلىسىمگە كەدەرگى جوق ەكەنىن اتاپ ءوتتى.
«وندىرىلگەن بەنزين مەن ديزەل وتىنىنىڭ 30 پايىزى قازاقستاندا قالادى، قالعانى رەسەيگە شىعارىلادى. سانكتسيالىق تاۋەكەلدەر جوق، سەبەبى بۇل كومپانيا سانكتسيالىق تىزىمگە ەنگىزىلمەگەن»، – دەدى مينيستر.
زاۋىتتىڭ ناقتى قاشان جانە قانداي كولەمدە ءونىم وندىرە باستايتىنى ازىرگە بەلگىسىز. بۇل تەمىرجول كولىگىنىڭ وتكىزۋ قابىلەتىنە بايلانىستى بولادى.
ەرلان اقكەنجەنوۆتىڭ ايتۋىنشا، كەلىسىم بويىنشا قازاقستاندا سۇرانىسقا يە مۇناي ونىمدەرىنىڭ 30 پايىزىنا دەيىن قالۋى ءتيىس. مينيستر بۇل كەلىسىمنىڭ ەل ەكونوميكاسى ءۇشىن بىرقاتار ارتىقشىلىعى بارىن اتاپ ءوتتى.
«مەن ءۇشىن ەنەرگەتيكا ءمينيسترى رەتىندە ەڭ ماڭىزدىسى – ساپالى مۇناي ونىمدەرىن ءوندىرۋ، ىشكى نارىقتى قامتاماسىز ەتۋ جانە جۇمىس ورىندارىن ساقتاۋ»، – دەپ قورىتىندىلادى ەرلان اقكەنجەنوۆ.
