اۋكتسيونداعى ساۋدا. ءماسىموۆتىڭ بۇيىمدارىنان قىلىشى عانا ساتىلدى

قايتارىلعان اكتيۆتەردى باسقارۋ كومپانياسى اۋكتسيوندا ءماسىموۆتىڭ سامۋراي قىلىشىن ساتتى، دەپ حابارلايدى "ادىرنا" ۇلتتىق پورتالى.

كومپانيا 4 قاراشا كۇنى بۇرىن تاركىلەنگەن ليۋكس بۇيىمداردى ەلەكتروندى ساۋدا الاڭىنا شىعارعان. بارلىعى 520 ميلليون تەڭگەدەن استام سوماعا باعالانعان 42 ءتۇرلى زات ساتىلىمعا قويىلدى. 

الايدا اۋكتسيون ناتيجەسىندە ۇقك-نىڭ بۇرىنعى توراعاسى كارىم ءماسىموۆتىڭ استاناداعى ۇيىنەن تاركىلەنگەن سامۋراي قىلىشى عانا ساتىلدى. بولاتتان جاسالعان، سابىندا گەومەتريالىق ورنەگى بار بۇل قىلىش 542,7 مىڭ تەڭگەگە باعالانعان.

قالعان ءساندى بۇيىمدار – Patek Philippe, Harry Winston ساعاتتارى، Van Cleef & Arpels پەن DE BEERS اشەكەيلەرى ساتىپ الۋشىلاردىڭ نازارىن اۋدارماعان.

بۇعان دەيىن قازان ايىندا وتكەن باسقا ءبىر اۋكتسيوندا ءماسىموۆتىڭ جەتى زاتى 3,5 ميلليون تەڭگەگە ساتىلعان.

ەسكە سالايىق، كارىم ءماسىموۆ 2022 جىلعى قاڭتار وقيعالارىنان كەيىن مەملەكەتكە وپاسىزدىق جاسادى دەگەن ايىپپەن قاماۋعا الىنعان. 2023 جىلى ول 18 جىلعا باس بوستاندىعىنان ايىرىلىپ، بارلىق مۇلكى مەملەكەتكە تاركىلەندى. كەيىن وعان قاتىستى پارا الۋ جانە اقشانى زاڭداستىرۋ باپتارى بويىنشا جاڭا قىلمىستىق ءىس قوزعالدى.