قازاقستان 2026 جىلى 98 ملن توننا مۇناي ءوندىرۋدى جوسپارلاپ وتىر. بۇل تۋرالى 10 ماۋسىمدا ەنەرگەتيكا ءمينيسترى ەرلان اقكەنجەنوۆ ايتتى، دەپ حابارلايدى «ادىرنا» ءتىلشىسى.
«بيىل تەڭىزدەگى توقتاۋلار مەن كقك ينفراقۇرىلىمىنا جاسالعان شابۋىلداردى ەسكەرە وتىرىپ، 98 ملن توننا مۇناي ءوندىرۋدى جوسپارلاپ وتىرمىز. بۇعان دەيىن شامامەن 5 ملن توننا مۇنايدى جوعالتقانىمىزدى ايتقان ەدىم»، – دەدى مينيستر.
ونىڭ سوزىنشە، قازاقستان قاشاعان كەن ورنىنداعى جوندەۋ جۇمىستارىن 2027 جىلعا اۋىستىرعان.
«سوندىقتان بولجامدى كورسەتكىشكە قوسىمشا 2–2,5 ملن توننا ەنگىزدىك. ناتيجەسىندە 98 ملن توننا مۇناي وندىرەمىز دەپ ەسەپتەپ وتىرمىز»، – دەپ تولىقتىردى اقكەنجەنوۆ.
بۇعان دەيىن مينيستر 2026 جىلدىڭ قورىتىندىسى بويىنشا مۇناي ءوندىرۋ كولەمى 96–98 ملن توننا دەڭگەيىندە بولادى دەپ بولجاعان ەدى.
مامىر ايىنىڭ سوڭىندا «تەڭىزشەۆرويل» كومپانياسى وندىرىستىك اقاۋ سالدارىنان مۇناي ءوندىرۋ كولەمى ۋاقىتشا تومەندەگەنىن حابارلاعان بولاتىن. ال 1 ماۋسىمدا كومپانيا مۇناي ءوندىرۋ كولەمى قالپىنا كەلىپ جاتقانىن جانە قالىپتى دەڭگەيگە جاقىنداعانىن مالىمدەدى.
قازاقستان مۇنايىنىڭ شامامەن 80 پايىزى ەكسپورتتالاتىن كاسپي قۇبىر كونسورتسيۋمى ينفراقۇرىلىمىنا ۋكراينالىق ەكيپاجسىز كاتەرلەر شابۋىل جاساعان. سونىڭ سالدارىنان تەڭىزدەگى تيەۋ قۇرىلعىلارىنىڭ ءبىرى قاتتى زاقىمدانسا، ەكىنشىسى سول كەزدە جوندەۋدە بولعان.
ايتا كەتەيىك، قازاقستاندا 2025 جىلى 99,55 ملن توننا مۇناي ءوندىرىلىپ، ونىڭ 78,7 ملن تونناسى ەكسپورتقا جونەلتىلگەن.
