قوستاناي حالىقارالىق اۋەجايى تاعى دا اۋكتسيونعا شىعارىلدى، دەپ حابارلايدى "ادىرنا" ءتىلشىسى.
احمەت بايتۇرسىنوۆ اتىنداعى قوستاناي حالىقارالىق اۋەجايى جەكەشەلەندىرىلمەك. نىسان وسى ۋاقىتقا دەيىن ەكى رەت اۋكتسيونعا شىعارىلعان بولاتىن.
2018 جىلعى اۋكتسيوننان سوڭ اۋەجاي رەسپۋبليكالىق بالانستان وبلىس اكىمدىگىنىڭ بالانسىنا بەرىلدى. ودان كەيىن عيماراتتىڭ ءوزى دە، ۇشۋ-قونۋ جولاعى دا جوندەۋدەن ءوتتى.
قارجى باسقارماسىنىڭ اقپاراتىنشا قازىر اكىمدىك نىساندى ناقتى قالاي جەكەشەلەندىرۋ تۋرالى ماسەلەلەر تالقىلانىپ جاتىر.
"مەملەكەتتىك مۇلىكتى يەلىكتەن شىعارۋدىڭ كوپتەگەن جولى بار. ساتىپ الۋ قۇقىعىمەن سەنىمگەرلىك باسقارۋعا بەرىلۋى مۇمكىن، تەندەر نەمەسە اۋكتسيوندا بىرنەشە جولمەن ساتىلىمعا شىعارىلۋى مۇمكىن. ياعني مەملەكەتتىك ورگانداردان جەرگىلىكتى دەڭگەيدە مەملەكەتتىك كوميسسيا قۇرىلىپ، وسى ءۇش ءادىستىڭ ءبىرىن بەكىتۋ شەشىمى شىعارىلادى", - دەيدى قوستاناي وبلىسى اكىمدىگىنىڭ قارجى باسقارماسىنىڭ باسشىسى الما ءجۇسىپوۆا.
