ۋكراينانىڭ بۇرىنعى پرەزيدەنتى ۆيكتور يانۋكوۆيچكە تاعى ءبىر سىرتتاي ۇكىم شىعارىلدى. ەلدىڭ جوعارى انتيكوررۋپتسيالىق سوتىنىڭ مالىمەتىنشە، ول جەر تەلىمدەرىن زاڭسىز يەمدەنگەنى ءۇشىن 15 جىلعا باس بوستاندىعىنان ايىرىلدى، دەپ حابارلايدى «ادىرنا» ءتىلشىسى.
ءىس ماتەريالدارىنا سايكەس، 2007 جىلى سول كەزدەگى پرەمەر-مينيستر ۆيكتور يانۋكوۆيچ كيەۆ وبلىسىنداعى دنەپر–تەتەرەۆ ورمان-اڭشىلىق شارۋاشىلىعىنا تيەسىلى ورمان قورى جەرىن يەمدەنۋ ماقساتىندا جەر ءبولۋ تۋرالى شەشىمدەردىڭ قابىلدانۋىنا باستاماشى بولعان.
«قىلمىستىق سحەمانى جۇزەگە اسىرۋ ءۇشىن بۇرىنعى پرەزيدەنتتىڭ سىبايلاستارى وزدەرىنە جاقىن ادامداردى تارتقان. ولار كيەۆ وبلىستىق مەملەكەتتىك اكىمدىگىنە ارقايسىنا 1 گەكتارعا دەيىن جەر ءبولۋ تۋرالى ءوتىنىش بەرگەن. كەيىن بۇل جەردى بۇرىنعى پرەزيدەنتكە باعىنىشتى كومپانياعا كەدەرگىسىز وتكىزۋگە مۇمكىندىك بەرگەن»، – دەلىنگەن حابارلامادا.
2009–2011 جىلدارى بۇل اۋماقتا قوناقۇي-مەيرامحانا كەشەنى سالىنعان، ونى ۆيكتور يانۋكوۆيچ جەكە قاجەتىنە پايدالانعان.
سوت بۇرىنعى پرەزيدەنتتى ورمان قورىنىڭ 17,5 گەكتار جەرىن زاڭسىز يەمدەنگەنى ءۇشىن كىنالى دەپ تانىدى. جەردىڭ شامامەن قۇنى 22 ملن گريۆەننەن (شامامەن 260 ملن تەڭگە - رەد.) اسادى.
2025 جىلدىڭ ساۋىرىندە ۆيكتور يانۋكوۆيچ تاعى دا سىرتتاي 15 جىلعا سوتتالعان بولاتىن. ول دەزەرتيرلىككە ارانداتۋ جانە مەملەكەتتىك شەكارادان زاڭسىز وتكىزۋ ءىسىن ۇيىمداستىردى دەپ ايىپتالعان.
2019 جىلدىڭ قاڭتارىندا يانۋكوۆيچكە ۋكرايناعا وپاسىزدىق جاساعانى جانە ەلگە قارسى اگرەسسيالىق سوعىستى قولداعانى ءۇشىن 13 جىل تۇرمە جازاسى تاعايىندالعان ەدى. بۇل ۇكىم دە سىرتتاي شىعارىلعان، سەبەبى ول 2014 جىلى ەلدەن قاشىپ كەتكەن.
بۇعان دەيىن ۋكراينا باس پروكۋراتۋراسى ەكس-پرەزيدەنت ۆيكتور يانۋكوۆيچ رەسەيدىڭ ماسكەۋ وبلىسىنداعى بارۆيحا ەلدى مەكەنىندە تۇرىپ جاتقانىن حابارلاعان.
ۆيكتور يانۋكوۆيچ — ۋكراينانىڭ ءتورتىنشى پرەزيدەنتى (2010–2014). ول ەكى رەت ۋكراينا پرەمەر-ءمينيسترى دە بولعان.
