وزبەكستان بيلىگى تاشكەنتتەگى مەكتەپتە 9-سىنىپ وقۋشىسىن ۇرعان مۇعالىمگە قاتىستى ءوز ۇستانىمىن جاريالادى، دەپ حابارلايدى «ادىرنا» ءتىلشىسى.
رەسمي ۇستانىمعا سايكەس، وقۋشى ءوز ارەكەتىمەن مۇعالىمدى قول كوتەرۋگە دەيىن جەتكىزگەن. مۇعالىمگە قاتىستى قىلمىستىق ءىس توقتاتىلىپ، وقۋشىنىڭ اتا-اناسى اكىمشىلىك جاۋاپكەرشىلىككە تارتىلعان.
وقيعا بولعان مەكتەپكە بارعان ىشكى ىستەر ءمينيسترىنىڭ ءبىرىنشى ورىنباسارى رۋستام دجۋراەۆ مۇعالىمدەرگە ۇندەۋ جاساپ، پەداگوگتاردىڭ «قورعاۋدا» ەكەنىن مالىمدەدى.
«سىزدەردىڭ ارتتارىڭىزدا — اسكەر، پوگون تاققان ادامدار، گەنەرالدار تۇر»، — دەدى ول.
19 مامىر كۇنى ميرزو-ۇلىقبەك اۋدانىنداعى №275 مەكتەپتىڭ 9-سىنىبىندا وقۋشى ر.ر. (2010 جىلى تۋعان) مەن ينفورماتيكا ءپانىنىڭ مۇعالىمى زوكيرجون ومونوۆ (2002 جىلى تۋعان) اراسىندا جانجال شىققان. ينتەرنەتتە تاراعان ۆيدەودا مۇعالىمنىڭ وقۋشىنى ۇرىپ جاتقانى كورىنەدى.
رەسمي مالىمەتكە سايكەس، جانجالعا وقۋشىنىڭ ساباق وتكىزۋگە كەدەرگى كەلتىرۋى سەبەپ بولعان. تاشكەنت قالالىق ءىىبب-نىڭ 21 مامىردا جاريالاعان باستاپقى اقپاراتىنا قاراعاندا، مۇعالىم وقۋشىعا دەنە جاراقاتىن سالعان، سودان كەيىن زارداپ شەككەن بالا مەديتسينالىق كومەككە جۇگىنگەن. مۇعالىمگە قاتىستى قىلمىستىق كودەكستىڭ 105-بابى («دەنساۋلىققا قاساقانا ورتاشا اۋىرلىقتاعى زيان كەلتىرۋ») بويىنشا قىلمىستىق ءىس قوزعالعان.
25 مامىر كۇنى وتكەن ءباسپاسوز ءماسليحاتىندا ىشكى ىستەر ءمينيسترىنىڭ ءباسپاسوز حاتشىسى شوحرۋح گياسوۆ قىلمىستىق ءىستىڭ توقتاتىلعانىن ايتىپ، كەيىنىرەك تولىق اقپارات بەرىلەتىنىن مالىمدەدى.
26 مامىردا Telegram-ارنالاردا تەرگەۋ قورىتىندىسى تۋرالى ۆيدەورەپورتاج تارادى. وندا مەكتەپتەگى وقيعا ء«ادىل شەشىممەن اياقتالعانى» ايتىلعان.
رەپورتاجدا سىنىپتاعى باقىلاۋ كامەراسىنىڭ ۆيدەوسى كورسەتىلگەن. وندا ساباق كەزىندە ارتقى پارتادا وتىرعان وقۋشىلاردىڭ ءبىرى ەكىنشىسىنىڭ باسىنا سۋ قۇيعانى بايقالادى. كەيىن ولار ءبىر-بىرىنە سۋ شاشا باستاعان. مۇعالىم ەكەۋىن سىنىپتان شىعارماق بولعان كەزدە قارا جەيدە كيگەن وقۋشى ونىڭ يىعىنان ۇستاعان.
«سىرتقا شىعۋدى ۇسىنعانىمدا، ول “قولىڭدى تارت” دەپ ايقايلادى. مەن ونى شاپالاقپەن تارتىپ جىبەردىم. ول ەكى رەت جۇدىرىقپەن ۇرىپ، اياعىمنان ۇستاپ، قۇلاتۋعا تىرىستى. ەسىكتى تەپتى، بوقتىق سوزدەر ايتتى. مەنىڭ ەشكىمدى ۇرايىن دەگەن نيەتىم بولعان جوق. ارينە، قىزبالىققا سالىندىم، بىراق مۇنداي جاعداي ونىڭ قارسى ارەكەتىنەن كەيىن بولدى»، — دەدى زوكير ومونوۆ تاشكەنت قالالىق ءىىبب ءباسپاسوز قىزمەتىنە بەرگەن سۇحباتىندا.
№275 مەكتەپ مۇعالىمدەرىنىڭ ايتۋىنشا، اتالعان وقۋشىلار بۇرىننان تارتىپسىزدىگىمەن ەرەكشەلەنگەن.
«بۇل بالالاردىڭ قاتىسۋىمەن بۇعان دەيىن دە بىرنەشە جانجال بولعان، اگرەسسيا بەلگىلەرى بايقالعان. ءبىز اتا-انالارىمەن جۇمىس ىستەدىك، اقپارات بەردىك، مەكتەپكە شاقىردىق»، — دەدى مەكتەپ ۇجىمىنىڭ وكىلدەرىنىڭ ءبىرى.
ىشكى ىستەر ورگاندارى باسشىلارى قاتىسقان مەكتەپتەگى جيىندا تاشكەنت قالالىق ءىىبب باسشىسى راۆشان سۋلتونحودجاەۆ مۇعالىمگە قاتىستى قىلمىستىق ءىستىڭ تولىق توقتاتىلعانىن جاريالادى.
«مۇعالىمگە كوتەرىلگەن كەز كەلگەن قول، ايتىلعان كەز كەلگەن قورلىق جاۋاپسىز قالمايدى. بالانى تاربيەلەۋگە اتا-انا تىكەلەي جاۋاپتى»، — دەدى سۋلتونحودجاەۆ.
