قازاقستان رەسپۋبلكاسىنىڭ پرەزيدەنتى قاسىم-جومارت توقاەۆ قايتادان ماسكەۋگە ات باسىن بۇردى. مەملەكەت باسشىسى رەسەي استاناسىنا 25 مامىر كۇنى وتەتىن جوعارى ەۋرازيالىق ەكونوميكالىق كەڭەستىڭ وتىرىسىنا قاتىسۋ ءۇشىن باردى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەمە جاساپ.
بۇگىن پرەزيدەنت «كوپپوليارلى الەمدەگى ەۋرازيالىق ينتەگراتسيا» اتتى ەۋرازيالىق ەكونوميكالىق فورۋمىنىڭ پلەنارلىق وتىرىسىنا قاتىسادى.
مەملەكەت باسشىسى قاسىم-جومارت توقاەۆپەن قاتار فورۋمعا رەسەي باسشىسى ۆلاديمير پۋتين، بەلارۋس پرەزيدەنتى الەكساندر لۋكاشەنكو، قىرعىزستان باسشىسى سادىر جاپاروۆ قاتىسادى، سونداي-اق قىتاي حالىق رەسپۋبليكاسىنىڭ توراعاسى سي تسزينپين بەينەبايلانىس رەجيمىندە ءسوز سويلەيدى دەپ جوسپارلانىپ وتىر.
ورايى كەلگەندە ايتا كەتەيىك، بۇدان بۇرىن، 9 مامىر كۇنى، ماسكەۋدە وتكەن اسكەري شەرۋگە بارعان ەل باسشىسىنىڭ ساپارى دا قوعامدىق پىكىر تۋدىرعان ەدى. پرەزيدەنتتىڭ الدىڭعى ساپارى جايلى ءماجىلىس توراعاسى ەرلان قوشانوۆ بىلاي دەپ جاۋاپ بەرگەن.
- مەن بۇل ساپاردى وتە دۇرىس ساپار دەپ ەسەپتەيمىن. سەبەبى ۇلى وتان سوعىسى – ءبىزدىڭ ورتاق تاريحىمىز. ۇلى جەڭىس ول دا ءبىزدىڭ ورتاق تاريحىمىز. سوندىقتان سول باۋىرلاس مەملەكەتتەردىڭ باسشىلارىنىڭ بارلىعى دەرلىك كەشەگى پارادتا بولدى. بۇل ءبىزدىڭ سوعىستا شەيت بولعان اتا-بابالارىمىزعا ارنالعان قۇرمەت دەپ ويلايمىن. بۇل جەردە بۇل ماسەلەنى ساياسيلاندىرۋدىڭ قاجەتى جوق. بۇل ءبىر. ەكىنشىدەن، ءبىزدىڭ قازاقستاننىڭ وزىنەن 1 ملن 200 مىڭعا جۋىق ادام سوعىسقا كەتتى. سول سوعىستان ءبىزدىڭ اكە، اتالارىمىزدىڭ جارتىسى ورالمادى. ولاردىڭ كوبىسى رەسەي جەرىندە جاتىر. جاۋىنگەرلەردىڭ ىزدەۋشىسى، جوقتاۋشىسى بولۋى كەرەك پە، بولماۋى كەرەك پە؟ ىزدەۋشىسى، جوقتاۋشىسى كىم بولۋى كەرەك؟ مەنىڭ ويىمشا، قازاق حالقى مەن پرەزيدەنتىمىز بولۋى كەرەك. پرەزيدەنتتىڭ ساپارىن زەردەلەپ سارالايتىن بولساڭىز، ءبىرىنشى كەزەكتە پرەزيدەنت استاناداعى «وتان قورعاۋشىلار» مەموريالىنا گۇل شوعىن قويىپ، ەلىمىزدەگى وتان قورعاۋشىلارعا تاعزىم ەتتى، - دەيدى ءماجىلىس توراعاسى.
ول ءوزىنىڭ پورتال جۋرناليسىنە بەرگەن سۇحباتىندا "پرەزيدەنت - قازاق جاۋىنگەرىنىڭ جوقتاۋشىسى" دەپ ايتقانى كوپشىلىكتىڭ ءالى ەسىندە.
"ادىرنا" ۇلتتىق پورتالى
