قىرعىزستاندا MoveGreen ەكولوگيالىق ۇيىمى مەشىت يمامدارى مەن مەدرەسە وقىتۋشىلارىن يسلام قۇندىلىقتارى ارقىلى جاماعاتقا كليماتتىڭ وزگەرۋى مەن تابيعاتتى ايالاۋ تۋرالى تۇسىندىرۋگە ۇيرەتە باستادى. بۇل تۋرالى Kaktus.Media جازدى، دەپ حابارلايدى «ادىرنا» ءتىلشىسى.
ۇيىم جوبانى «قىرعىزستانداعى ءدىني قاۋىمداستىقتار اراسىندا كليماتتىق ءبىلىم، حاباردارلىق جانە بەلسەندىلىك دەڭگەيىن ارتتىرۋ» دەپ اتاعان. جوبا قىرعىزستاننىڭ تابيعي رەسۋرستار، ەكولوگيا جانە تەحنيكالىق قاداعالاۋ مينيسترلىگىنىڭ، ءدىن ىستەرى جانە ەتنوسارالىق قاتىناستار جونىندەگى ۇلتتىق اگەنتتىكتىڭ، سونداي-اق حالىقارالىق سەرىكتەستەردىڭ قولداۋىمەن جۇزەگە اسىرىلىپ جاتىر.
ۇيىمداستىرۋشىلاردىڭ ايتۋىنشا، جوبا اياسىندا قۇران مەن حاديستەرگە تالداۋ جاسالىپ، ونداعى ادامنىڭ قورشاعان ورتاعا قارىم-قاتىناسىنا قاتىستى تۇستارى زەرتتەلگەن. MoveGreen وكىلدەرى يسلام دەرەككوزدەرىندە تابيعاتقا ۇقىپتى قاراۋ قاجەتتىگى تۋرالى كوپتەگەن نۇسقاۋ بار ەكەنىن، جەر ادامعا امانات رەتىندە بەرىلىپ، ونى ساقتاۋ مىندەت ەكەنى ايتىلاتىنىن اتاپ ءوتتى.
وسى تالداۋ نەگىزىندە ۇيىم يسلام قۇندىلىقتارى ارقىلى كليماتتىق ءبىلىم بەرۋگە ارنالعان وقۋ-ادىستەمەلىك قۇرال دايىنداعان. ماتەريالدار ي.اراباەۆ اتىنداعى قىرعىز مەملەكەتتىك ۋنيۆەرسيتەتىنىڭ ءدىنتانۋ ينستيتۋتىنا جانە توقماق قالاسىنداعى يسلام اكادەمياسىنا تاپسىرىلعان.
MoveGreen مالىمەتىنشە، جوبا اياسىندا 60 ءدىني قىزمەتكەرگە — 30 يمام مەن 30 مەدرەسە وقىتۋشىسىنا ارنالعان سەگىز ترەنينگ وتكىزىلگەن. قاتىسۋشىلارعا كليمات وزگەرىسىنىڭ قىرعىزستانعا اسەرى، سونىڭ ىشىندە مۇزدىقتاردىڭ ەرۋى، سۋ تاپشىلىعى، جايىلىمداردىڭ توزۋى، قۇرعاقشىلىق پەن سۋ تاسقىندارى تۋرالى ايتىلعان.
