شامامەن ءۇش ايعا سوزىلعان تسيفرلىق وقشاۋلاۋدان كەيىن يران جاھاندىق ينتەرنەتكە بىرتىندەپ قايتا قوسىلا باستادى. بۇل تۋرالى Euronews جازدى، دەپ حابارلايدى «ادىرنا» ءتىلشىسى.
باق مالىمەتىنشە، ەلدە 88 كۇن ىشىندە العاش رەت حالىقارالىق جەلىگە قولجەتىمدىلىكتىڭ ءىشىنارا قالپىنا كەلگەنى تىركەلگەن. الايدا كوپتەن كۇتكەن ينتەرنەتتىڭ «قوسىلۋى» بىردەن جاڭا كەدەرگىگە تاپ بولىپ، ىسكە سوت ارالاستى.
يراننىڭ اكىمشىلىك سوتى ينتەرنەتتى قالپىنا كەلتىرۋ ۇدەرىسىن باستاۋعا ءتيىس بولعان پرەزيدەنت جارلىعىنىڭ ورىندالۋىن ۋاقىتشا توقتاتقان. اڭگىمە كيبەركەڭىستىكتى باسقارۋ جونىندەگى ارنايى كوميتەت قۇرۋ تۋرالى بولىپ وتىر. بيلىك ينتەرنەتتى قايتا قوسۋدى ءدال وسى قۇرىلىم ارقىلى ۇيلەستىرمەك بولعان.
قۇقىقتىق داۋلارعا قاراماستان، يراندىق شەنەۋنىكتەر قوسىلۋ پروتسەسى باستالعانىن ايتىپ وتىر. بايلانىس مينيسترلىگى وكىلدەرىنىڭ سوزىنشە، حالىقارالىق ينتەرنەتكە قولجەتىمدىلىك كەزەڭ-كەزەڭىمەن اشىلادى، ال ءبىر تاۋلىك ىشىندە جەلى بۇكىل ەل اۋماعىندا جۇمىس ىستەۋى ءتيىس.
يراننىڭ ءبىرىنشى ۆيتسە-پرەزيدەنتى مۇحامماد رەزا ارەف بۇل جاعدايدى «كيبەركەڭىستىككە ەركىن ءارى رەتتەلەتىن قولجەتىمدىلىككە جاسالعان العاشقى قادام» دەپ اتادى. ول ينتەرنەتتىڭ قالپىنا كەلۋى تسيفرلىق ەكونوميكا مەن ونلاين قىزمەتتەردىڭ دامۋىنا سەرپىن بەرەدى دەپ ۇمىتتەنەدى.
ەسكە سالايىق، يران تۇرعىندارىنىڭ كوپ بولىگى ءالى كۇنگە دەيىن جاھاندىق جەلىدەن ءىس جۇزىندە وقشاۋ كۇيدە قالىپ وتىر. مونيتورينگ دەرەكتەرىنە سايكەس، ەلدەگى تسيفرلىق بلوكادا 2088 ساعاتتان استام ۋاقىتقا سوزىلعان.
