ۋكراينا مەن ەۋروپا ەلدەرى بىتىمگەرلىك كۇشتەردى ورنالاستىرۋ جونىندەگى دەكلاراتسياعا قول قويدى

ۋكراينا، فرانتسيا جانە ۇلىبريتانيا باسشىلارى پاريجدە ۋكراينا قورعانىسىن قولداۋ، ونى قالپىنا كەلتىرۋ جانە ستراتەگيالىق تۇراقتىلىقتى قامتاماسىز ەتۋ ماقساتىندا بىتىمگەرلىك كۇشتەردى ورنالاستىرۋعا قاتىستى نيەت دەكلاراتسياسىنا قول قويدى. بۇل تۋرالى ۋكراينالىق باق جازدى، دەپ حابارلايدى «ادىرنا» ءتىلشىسى.

مالىمدەمەگە سايكەس، قۇجاتقا ۋكراينا اتىنان ۋكراينا پرەزيدەنتى ۆلاديمير زەلەنسكي, فرانتسيا رەسپۋبليكاسىنان پرەزيدەنت ەممانۋەل ماكرون, ال ۇلىبريتانيا اتىنان پرەمەر-مينيستر كير ستارمەر قول قويعان.

دەكلاراتسيا پاريج قالاسىندا وتكەن «نيەتتىلەر كواليتسياسى» ءسامميتىنىڭ قورىتىندىسى بويىنشا راسىمدەلگەن. زەلەنسكي بۇل كەزدەسۋدى كواليتسيا تاريحىنداعى «ەڭ وكىلدى جيىن» دەپ اتادى.

ءسامميتتىڭ باستى ماقساتى – ۋكراينانىڭ قورعانىس الەۋەتىن نىعايتۋعا قولداۋ كورسەتۋ، سونداي-اق بەيبىتشىلىككە اپارار جولداعى ساياسي قادامداردى تالقىلاۋ بولدى. كەزدەسۋگە ۇلىبريتانيا مەن فرانتسيانىڭ جەتەكشىلىگىمەن 35 ەلدىڭ وكىلى قاتىستى. ولار رەسەيمەن اتىستى توقتاتۋ جاعدايىندا ۋكرايناعا اسكەر جىبەرۋگە دايىن ەكەنىن ءبىلدىردى.

تالقىلاۋلار ۋكراينا ءۇشىن قاۋىپسىزدىك كەپىلدىكتەرى مەن ولاردى ىسكە اسىرۋ تەتىكتەرىنە ارنالدى.

ايتا كەتەيىك، 6 قاڭتاردا فرانتسيا استاناسى پاريج قالاسىندا رەسەيمەن سوعىستا ۋكراينانى قولداپ وتىرعان ەلدەر كوشباسشىلارىنىڭ كەزدەسۋى وتكەن بولاتىن. سامميتكە سونداي-اق اقش پرەزيدەنتىنىڭ ارنايى وكىلى ستيۆ ۋيتكوفف پەن دونالد ترامپتىڭ كۇيەۋ بالاسى دجارەد كۋشنەر قاتىسقان.

بۇدان بولەك، 29 جەلتوقساندا اقش-تىڭ فلوريدا شتاتىندا اقش پرەزيدەنتى دونالد ترامپپەن ۋكراينا پرەزيدەنتى ۆلاديمير زەلەنسكي اراسىندا ەكى ساعاتتان استام ۋاقىتقا سوزىلعان كەلىسسوزدەر وتكەن. كەيىن تاراپتار بىرنەشە ەۋروپالىق كوشباسشىمەن تەلەفون ارقىلى سويلەسكەن.

زەلەنسكيدىڭ ايتۋىنشا، بۇل كەزدەسۋلەر بارىسىندا بەيبىت رەتتەۋ شەڭبەرىندەگى بارلىق نەگىزگى ماسەلە تالقىلانىپ، «ايتارلىقتاي ناتيجەلەرگە» قول جەتكىزىلگەن. ال فرانتسيا پرەزيدەنتى ەممانيۋەل ماكرون قاۋىپسىزدىك كەپىلدىكتەرى بويىنشا ىلگەرىلەۋ بار ەكەنىن ايتىپ، ولاردىڭ ء«ادىل ءارى تۇراقتى بەيبىتشىلىك ورناتۋدا شەشۋشى ءرول اتقاراتىنىن» مالىمدەگەن.

سونىمەن قاتار ۋكراينا تاراپىنان كەلىسسوز جۇرگىزۋشى، ۇلتتىق قاۋىپسىزدىك جانە قورعانىس كەڭەسىنىڭ حاتشىسى رۋستەم ۋمەروۆ 3 قاڭتاردا وتكەن كەڭەسشىلەر كەزدەسۋىنەن كەيىن بەيبىت جوسپاردىڭ شامامەن 90 پايىزى كەلىسىلگەنىن، قالعان تۇستارى بويىنشا جۇمىس جالعاسىپ جاتقانىن ايتقان.