رەسەيدىڭ ورىنبور جانە ۋفا قالالارىنداعى Ozon كومپانياسىنىڭ لوگيستيكالىق نىساندارىنا دروندار شابۋىل جاسادى، دەپ حابارلايدى "ادىرنا" ءتىلشىسى DW-عا سىلتەپ.
بۇل تۋرالى كومپانيا حابارلادى.
Ozon مالىمەتىنشە، شابۋىل كەزىندە بارلىق قىزمەتكەر قاۋىپسىز جەرگە ەۆاكۋاتسيالانعان. الدىن الا اقپارات بويىنشا، زارداپ شەككەندەر جوق جانە ءورت شىقپاعان. ورىنبورداعى نىسان جۇمىسىن قايتا باستادى. ال ۋفاداعى لوگيستيكالىق كەشەن ازداپ زاقىمدانعاندىقتان، ۋاقىتشا جابىلدى. قازىر نىسان اۋماعىن تەكسەرۋ جۇمىستارى جۇرگىزىلىپ جاتىر. جەتكىزۋشىلەردەن تاۋار قابىلداۋ ۋاقىتشا توقتاتىلعان، ال تاۋارلاردىڭ ءبىر بولىگى باسقا نىساندارعا باعىتتالۋدا. ورىنبور وبلىسىنىڭ گۋبەرناتورى ەۆگەني سولنتسەۆتىڭ مالىمەتىنشە، وڭىردە اۋە قاۋىپسىزدىگىنە بايلانىستى «كوۆەر» جوسپارى ەنگىزىلىپ، كەيىن الىنىپ تاستالدى. ورىنبور جانە ورسك اۋەجايلارى شتاتتىق رەجيمدە جۇمىسىن جالعاستىردى.
بۇل Ozon نىساندارىنا سوڭعى كۇندەرى جاسالعان بىرنەشە شابۋىلدىڭ ءبىرى. بۇعان دەيىن سامارا وبلىسىنىڭ چاپاەۆسك قالاسىنداعى، ورىنبور، ادىگەيا، ستاۆروپول ولكەسى مەن داعىستانداعى كومپانيانىڭ لوگيستيكالىق نىساندارىنا دروندار شابۋىل جاساعان.
