قازاقستان بۋچا قالاسىنا ورناتىلعان كيىز ۇيدەن ەشقانداي ماسەلە كورمەيدى. بۇل تۋرالى سىرتقى ىستەر مينيسترلىگىنىڭ وكىلى ايبەك سمادياروۆ ايتتى، دەپ حابارلايدى “Aدىرنا” ۇلتتىق پورتالى.
سونداي-اق، ول بۋچاداعى كيىز ءۇي تۋرالى قازاقستان رەسەي بيلىگىنە رەسمي تۇسىنىكتەمە بەرمەيتىنىن ايتتى.
“كيىز ءۇي قويىلدى. بۇدان قانداي پروبلەما تۋىندادى؟ قويىلدى. كومەك كورسەتىلدى. بۇل جەكە قازاقستاندىق كومپانيالاردىڭ باستاماسى. وزدەرى جيناپ، اپارىپ، كومەكتەسىپ جاتىر”،- دەپ ايتتى ءميۇيستر.
ەسكە سالايىق، قاڭتار ايىنىڭ باسىندا ۋكراينانىڭ كيەۆ وبلىسى بۋچادا "نەزلامنوستى" ياعني، "مىزعىماستىق" پۋنكتى اشىلعان ەدى. قازاق ءۇي ىشىنە ورنالاسقان پۋنكت تۇرعىندارعا قىس كەزىندە جارىق پەن جىلۋ بولماعان شاقتا تۇرعىندار كەلىپ، جىلىنىپ، تەلەفوندارىن قۋاتتاپ الۋ ءۇشىن اشىلعان.
ۋكراينا دەپۋتاتى سەرگەي ناگورنياك جوبا قازاقستاندىق كاسىپكەرلەر مەن ۋكرايناداعى قازاق دياسپوراسى وكىلدەرىنىڭ ارقاسىندا پايدا بولعانىن ايتقان.
ال رەسەي بۋچاداعى كيىز ۇيگە قاتىستى قازاقستان بيلىگىن رەسمي تۇسىنىكتەمە بەرۋگە ۇندەدى. رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا قازاقستاننىڭ رەسمي وكىلدەرى بۋچاداعى كيىز ۇيگە قاتىسى جوعىن ايتتى دەپ مالىمدەدى.
دەگەنمەن، زاحاروۆا ەكى ەلدىڭ وداقتاستىعىنا نۇقسان كەلمەس ءۇشىن جانە بۇل تاقىرىپ ءارى قاراي دا بۇرمالالانباس ءۇشىن قازاقستاننىڭ رەسمي تۇسىنىكتەمە بەرگەنى ءجون سانايدى.
