بۇگىن — حالىق قاھارمانى، اشىق كەڭىستىككە 8 رەت شىققان رەكوردشى عارىشكەر تالعات مۇساباەۆتىڭ تۋعان كۇنى، دەپ حابارلايدى «ادىرنا» ءتىلشىسى.
تالعات امانگەلدىۇلى 1951 جىلى الماتى وبلىسى قارعالى اۋىلىندا دۇنيەگە كەلگەن. ول لەنين كومسومولى اتىنداعى ريگا ازاماتتىق اۆياتسيا ينجەنەرلەرى ينستيتۋتىن “اۆياتسيالىق راديو جابدىقتارىن تەحنيكالىق پايدالانۋ” ماماندىعى بويىنشا، الماتىداعى ارمياعا، اۆياتسيا مەن فلوتقا جاردەمدەسۋ ەرىكتى قوعامىنىڭ اەروكلۋبىن، سونداي-اق اقتوبە ازاماتتىق اۆياتسياسىنىڭ جوعارى ۇشقىشتار ۋچيليششەسىن تامامداعان.
ديپلوم العاننان كەيىن ءبىر جىل بورالداي ازاماتتىق اۆياتسيا وتريادىندا راديو جابدىقتار ينجەنەرى بولىپ جۇمىس ىستەگەن. 1975 جىلدىڭ قاڭتارىندا الماتىداعى كومسومول كوميتەتىنىڭ بوساتىلعان حاتشىسى بولىپ سايلانعان. كەيىن قازاق ازاماتتىق اۆياتسيا باسقارماسىندا نۇسقاۋشى، اعا نۇسقاۋشى بولىپ ەڭبەك ەتكەن.
1986 جىلى عارىشكەر ۇشىرۋ باعدارلاماسى اياسىندا مەديتسينالىق كوميسسيادان وتە باستاعان، بىراق جوبا جالعاسىن تاپپاعان. 1987 جىلدان ان-2 ۇشاعىنىڭ ەكىنشى پيلوتى، 1989 جىلدان كومانديرى بولىپ قىزمەت ەتكەن.
1988 جىلى قايتادان مەديتسينالىق تەكسەرۋدەن ءوتىپ، ارنايى دايىندىققا رۇقسات العان. 1990 جىلدىڭ مامىرىندا عارىشكەرلەر قۇرامىنا ۇسىنىلعان. سول جىلدىڭ قازانىندا عارىشكەرلەردى دايارلاۋ ورتالىعىنا جىبەرىلىپ، جالپى عارىشتىق دايىندىققا كىرىسكەن. 1991 جىلى ناۋرىزدا «عارىشكەر-سىناقشى» كانديداتى لاۋازىمىنا بەكىتىلگەن.
تالعات مۇساباەۆ - قازاقتىڭ 2-ءشى، ال الەمنىڭ 309-شى عارىشقا ءۇش رەت ۇشقان عارىشكەرى. 8 رەت اشىق كوسموسقا شىعىپ، وندا جيىنتىعى 43 ساعات 46 مينۋت بولعان. سونداي-اق ول عارىشقا قازاقستان تۋىن العاش رەت الىپ شىققان جانە وربيتاعا قۇراندى جەتكىزگەن ەڭ العاشقى جانە ازىرگە جالعىز عارىشكەر بولدى. ءوزىنىڭ ايتۋىنشا، قاسيەتتى كىتاپتى عارىشقا ودان بۇرىن دا، كەيىن دە ەشكىم اپارماعان.
تالعات مۇساباەۆ 1995 جىلى "حالىق قاھارمانى", "قازاقستاننىڭ عارىشكەر-ۇشقىشى", 1998 جىلى "وتان" جانە ءبىرىنشى دارەجەلى "بارىس" وردەنىن، 1999 جىلى "استانا" مەدالىن العان. ودان بولەك، رەسەي فەدەراتسياسى تاراپىنان 1991 جىلى "حالىقتار دوستىعى" وردەنىن، 1994 جىلى "رەسەي فەدەراتسياسىنىڭ قاھارمانى" مەن "رف ۇشقىش-عارىشكەرى", 1998 جىلى ەكىنشى جانە ءۇشىنشى دارەجەلى "وتان الدىنداعى ەڭبەگى ءۇشىن" ماراپاتتارىن يەلەنگەن.
ءار جىلدارى قازاقستان ۇلتتىق عارىش اگەنتتىنىڭ توراعاسى، پرەزيدەنت كەڭەسشىسى، پارلامەنت سەناتىنىڭ دەپۋتاتى بولىپ قىزمەت اتقارعان.
ءبىرتۋار تۇلعا 2025 جىلدىڭ 4 تامىزىندا 74 جاسىندا ومىردەن وزدى.
