بۇگىن كومپوزيتور، ەتنوگراف - عالىم، قازاقتىڭ جانە كوپتەگەن حالىقتاردىڭ ءداستۇرلى ۇلتتىق مۋزىكاسىن زەرتتەپ ونى نوتاعا ءتۇسىرۋشى جانە قازسسر-ءنىڭ تۇڭعىش حالىق ءارتىسى الەكساندر ۆيكتوروۆيچ زاتاەۆيچتىڭ تۋعانىنا – 155 جىل تولدى.
1869 جىلى ورلوۆ گۋبەرنياسىنىڭ بولحوۆ قالاسىندا دۇنيەگە كەلگەن ول العاشقى ءبىلىمىن ورەل قالاسىنداعى اسكەري گيمنازيادا العان.
1920 جىلدان باستاپ جول قيىندىعىنا قاراماستان قازاقستاننىڭ بارلىق ايماقتارىن ارالاپ، ءومىرىنىڭ سوڭعى جىلدارىنا دەيىن قازاقتىڭ ونەردەگى باي-مۇراسىن جيناپ، ۇلتتىق مۋزىكانى زەرتتەۋگە جول اشتى. ول ەل ارالاپ ءجۇرىپ قازاق زيالىلارىمەن، بەلگىلى ءانشى-كۇيشىلەرمەن، قاراپايىم جۇرتشىلىقپەن كەزدەسۋ ناتيجەسىندە 1925 جىلى «قازاقتىڭ 1000 ءانى»، ال 1931 جىلى «قازاقتىڭ 500 اندەرى مەن كۇيلەرى» اتتى جيناقتارىن شىعاردى. ا.ۆ. زاتاەۆيچ جيناپ نوتاعا تۇسىرگەن قازاقتىڭ اندەرى مەن كۇيلەرى، مۋزىكالىق مۇراسى بۇكىل الەمگە تارادى. سونىمەن قاتار ايگىلى ەتنوگراف، دارىندى كومپوزيتور قازاقتىڭ كامەرالىق مۋزىكاسىنىڭ دا نەگىزىن سالدى.
