بۇگىن – بار قازاقتىڭ جۇرەگىندە "مەن – قازاقپىن" دەپ جاتتالىپ قالعان، ءىرى ەپيك اقىن، مەملەكەتتىك سىيلىقتىڭ لاۋرەاتى (1978), قازاقستاننىڭ حالىق جازۋشىسى (1985) جۇبان مولداعاليەۆتىڭ تۋعانىنا 105 جىل تولدى، دەپ حابارلايدى “ادىرنا”.
جۇبان مولداعاليەۆ – ورال وبلىسىنىڭ اقجايىق اۋدانىندا تۋعان. ورال اۋىل شارۋاشىلىعى تەحنيكۋمىن بىتىرگەن. 1940-1947 جىلدارى اسكەر قاتارىندا بولعان. ەكىنشى دۇنيەجۇزىلىك سوعىسقا قاتىسقان.
1948-1952 جىلدارى — «لەنينشىل جاس» گازەتىندە ءبولىم مەڭگەرۋشىسى، جاۋاپتى حاتشى، رەداكتوردىڭ ورىنباسارى.
1952-1954 جىلدارى — قازاقستان جازۋشىلار وداعىندا ادەبي كەڭەسشى.
1955-1956 جىلدارى — «قازاق ادەبيەتى» گازەتى رەداكتورىنىڭ ورىنباسارى.
1957-1963 جىلدارى — «جۇلدىز» جۋرنالىنىڭ باس رەداكتورى.
1963-1971 جىلدارى — قازاقستان جازۋشىلار وداعى باسقارماسىنىڭ حاتشىسى.
1973-1983 جىلدارى — كسرو جازۋشىلار باسقارماسىنىڭ حاتشىسى.
1979-1983 جىلدارى — قازاقستان جازۋشىلار وداعىنىڭ ءبىرىنشى حاتشىسى قىزمەتتەرىن اتقارعان.
1983-1988 جىلدارى — شىعارماشىلىق جۇمىسپەن اينالىستى.
العاشقى ولەڭى ورال وبلىستىق «كومسومول ۇرپاعى» گازەتىندە 1939 جىلى باسىلعان. 1949 جىلى «جەڭىس جىرلارى» دەگەن اتپەن تۇڭعىش ولەڭدەر جيناعى شىققان. سودان بەرگى جىلدار ىشىندە «نۇرلى جول»، «جىر تۋرالى جىر»، «عاشىق كوزبەن»، «زامان تىنىسى»، «بايقوڭىر باسپالداقتارى»، ت. ب. بارلىعى 60-تان استام كىتابى، ءار كەزەڭدە قازاق، ورىس تىلدەرىندە تاڭدامالى شىعارمالارىنىڭ ءبىر تومدىعى، قوس تومدىعى، ءۇش تومدىعى جارىق كوردى.
جۇبان مولداعاليەۆتىڭ ەڭ تانىمال شىعارمالارىنىڭ ءبىرى «مەن — قازاقپىن» پوەماسى 1964 جىلى جارىق كورگەن. ءوزى دۇنيەدەن وتكەننەن كەيىن شىعارمالارىنىڭ ەكى تومدىعى شىقتى. 1970 جىلى «كىسەن اشقان» پوەماسى ءۇشىن قازاق كسر مەملەكەتتىك سىيلىعىنا، 1978 جىلى «قىران دالا» جانە «سەل» پوەمالارى ءۇشىن كسرو مەملەكەتتىك سىيلىعىنا يە بولدى. كسرو قورعانىس مينيسترلىگى سىيلىعىنىڭ لاۋرەاتى جانە ا.فادەەۆ اتىنداعى التىن مەدالدىڭ يەگەرى. كوپتەگەن شىعارمالارى اعىلشىن، نەمىس، فرانتسۋز، پولياك، يسپان، ۆەنگر، اراب، موڭعول، سلوۆاك جانە باسقا دا تىلدەرگە اۋدارىلعان.
لەنين وردەنىمەن، ەكى رەت ەڭبەك قىزىل تۋ، ەكى رەت ءىى دارەجەلى وتان سوعىسى، «قۇرمەت بەلگىسى» وردەندەرىمەن، بىرنەشە مەدالدارمەن ماراپاتتالعان. 1985 جىلى «قازاق كسر حالىق جازۋشىسى» قۇرمەتتى اتاعى بەرىلدى.
اقىننىڭ 1986 جىلى جەلتوقسان وقيعاسىنان كەيىن ەلدىڭ جاڭا باسشىلىعى الدىندا، الاڭعا شىققان جاستاردى جاقتاپ سويلەۋى ونىڭ مارتەبەسىن اسىرا ءتۇستى.
