ايتىس اقىندارى وداعىنىڭ توراعاسى، اقىن، جۋرناليست، قازىرگى ايتىس ونەرىنىڭ ۇيىمداستىرۋشىسى، قازاقستان رەسپۋبليكاسىنىڭ ەڭبەك سىڭىرگەن قايراتكەرى ءجۇرسىن ەرمان 73 جاسقا تولدى، دەپ حابارلايدى “ادىرنا” ۇلتتىق پورتالى.
اقىن 1951 جىلى بۇرىنعى جەزقازعان وبلىسى جەزدى اۋدانىنىڭ بايقوڭىر اۋىلىندا دۇنيەگە كەلگەن بولاتىن.
1976 جىلى قازاق مەملەكەتتىك ۋنيۆەرسيتەتىن تامامداعان ول ءار جىلدارى ايماقتىق، رەسپۋبليكالىق اقپارات قۇرالدارىندا قىزمەت ەتتى.
100-دەن استام ماقالا مەن «جانارتاۋ» (1983), «ارايلى كۇن، ارمىسىڭ» (1985), «ۇلىتاۋعا باردىڭ با؟» (1989), «قۇدىرەتكە جۇگىنۋ» (2004), «ەكى تىزگىن، ءبىر شىلبىر» (2006), «قۇستىڭ كولەڭكەسى» سىندى ەڭبەكتەردىڭ اۆتورى.
1984 جىلدان اقىنداردى ۇلكەن ساحناعا شىعارىپ، حالىق ونەرى، ۇلتتىق رۋحتى كوتەرۋگە ۇلەس قوستى. اقىندار ايتىسىن جيناقتاپ جاريالاۋ، زەرتتەۋ جۇمىستارىن جۇرگىزىپ، «قازىرگى ايتىستار» (2005, استانا، 2 توم) جيناعىن قۇراستىردى.
ءجۇرسىن ەرماننىڭ بىرنەشە بەينە، اۋديوكاسسەتا، ديسكىلەرى جارىققا شىققان. قازاقستان جازۋشىلار وداعىنىڭ مۇقاعالي ماقاتاەۆ اتىنداعى سىيلىقتىڭ ەكى مارتە يەگەرى. حالىقارالىق قازاق ءتىلى قوعامىنىڭ مۇشەسى.
