قازاقستاندا ءموبيلدى جانە ينتەرنەت-الاياقتىقپەن كۇرەستى كۇشەيتۋگە باعىتتالعان جاڭا شارالار پاكەتى ىسكە قوسىلادى. بيلىك SIM-كارتالاردى پايدالانۋ ءتارتىبىن قاتاڭداتىپ، ابونەنتتەردى سايكەستەندىرۋ مەحانيزمدەرىن كەڭەيتپەك. بۇل تۋرالى تسيفرلىق دامۋ جانە جاساندى ينتەللەكت مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى "ادىرنا".
اقپاراتقا سايكەس، سوڭعى جىلدارى تەلەفون جانە ونلاين الاياقتىق كوبەيىپ، SIM-بوكستار، جاپپاي قوڭىراۋ شالاتىن قۇرىلعىلار مەن انونيم نومىرلەر نەگىزگى قۇرالعا اينالدى. جاڭا ەرەجەلەر وسى وسال تۇستاردى جابۋعا باعىتتالعان.
قابىلدانعان شەشىمدەر:
• الاياقتىق نومىرلەردى جەدەل انىقتاۋ;
• SIM-كارتالاردى زاڭسىز تىركەۋدى شەكتەۋ;
• ابونەنتتىڭ ناقتى كىم ەكەنىن دالەلدەيتىن تەتىكتەردى كۇشەيتۋ.
ماڭىزدى جاڭالىقتاردىڭ ءبىرى – ۇيالى بايلانىس وپەراتورلارىنىڭ ۇلتتىق بانكتىڭ انتيفرود-ورتالىعىمەن تىكەلەي ءوزارا ءىس-قيمىلى.
ەگەر كۇماندى قوڭىراۋلار نەمەسە SMS-حابارلامالار انىقتالسا، سونىڭ ىشىندە SIM-بوكستار ارقىلى جىبەرىلگەن جاپپاي حابارلامالار بولسا:
• وپەراتور اقپاراتتى انتيفرود-ورتالىققا جىبەرەدى;
• تەكسەرۋ جۇرگىزىلەدى;
• الاياقتىق بەلگىلەرى راستالسا، ءنومىر بىردەن بۇعاتتالادى، ال بايلانىس قىزمەتى توقتاتىلادى.
بۇل مەحانيزم الاياقتاردىڭ ارەكەت ەتۋ ۋاقىتىن قىسقارتىپ، قارجىلىق شىعىننىڭ الدىن الۋعا مۇمكىندىك بەرەدى.
جاڭا تارتىپكە سايكەس،ء بىر ادام جەكە جانە وتباسىلىق قاجەتتىلىك ءۇشىن 10 SIM-كارتاعا دەيىن عانا تىركەي الادى.
ال ودان كوپ ءنومىر قاجەت بولعان جاعدايدا:
• قاجەتتىلىك ناقتى نەگىزدەلۋى ءتيىس;
• SIM-كارتالار قولدانىلاتىن قۇرىلعىلار كورسەتىلەدى.
بۇل تالاپ الاياقتىق كولل-ورتالىقتارعا ءتان جاپپاي ءنومىر جيناۋ تاجىريبەسىن توقتاتۋعا باعىتتالعان.
ەندى SIM-كارتا راسىمدەۋ كەزىندە مىندەتتى بيومەتريالىق يدەنتيفيكاتسيا ەنگىزىلەدى. بۇل تالاپ:
• جەكە تۇلعالارعا;
• بيزنەسكە;
• كورپوراتيۆتىك SIM-كارتا الاتىن قىزمەتكەرلەرگە دە قاتىستى.
بيومەتريا ءانونيمدى ءنومىر قولدانۋ مۇمكىندىگىن جويادى جانە ءار ابونەنتتىڭ جەكە جاۋاپكەرشىلىگىن ارتتىرادى.
مامانداردىڭ ايتۋىنشا، بيومەتريالىق سايكەستەندىرۋ دەلدالدار مەن بەيرەسمي ديلەرلەر ارقىلى SIM-كارتا ساتۋدى ءتيىمسىز ەتەدى.
«SIM-كارتا قاي جەردە ساتىپ الىنعانىنا قاراماستان، بايلانىس قىزمەتى تەك ابونەنتتىڭ جەكە باسى راستالعاننان كەيىن عانا ىسكە قوسىلادى»، – دەلىنگەن رەسمي حابارلامادا.
جالپى العاندا، قابىلدانىپ جاتقان شارالار:
• بايلانىس نارىعىن اشىق ءارى قاۋىپسىز ەتەدى;
• تەلەفون جانە ينتەرنەت-الاياقتىقتى ازايتادى;
• ازاماتتاردى قارجىلىق جانە تسيفرلىق الداۋدان قورعاۋدى كۇشەيتەدى.
