ماڭعىستاۋ وبلىسىنىڭ جاستارىنا پەداگوگ ماماندىعىن الۋعا مۇمكىندىك بەرەتىن پيلوتتىق جوبا ىسكە قوسىلدى، دەپ حابارلايدى "ادىرنا" ۇلتتىق پورتالى.
ماڭعىستاۋ وبلىسى اكىمىنىڭ ءبىرىنشى ورىنباسارى اسحات ورالوۆ وڭىردەن شىققان، بۇگىندە شىمكەنت قالاسىنداعى وزبەكالى جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىندە ءبىلىم الىپ جاتقان ستۋدەنتتەرمەن كەزدەستى.
وبلىس اكىمدىگىنىڭ ءباسپاسوز قىزمەتىنىڭ مالىمەتىنشە، كەزدەسۋ ماڭعىستاۋ وبلىسى تۇلەكتەرىن ساپالى جوعارى پەداگوگيكالىق بىلىممەن قامتاماسىز ەتۋگە، وڭىردەگى مەكتەپتەردەگى كادر تاپشىلىعىن ازايتۋعا جانە ءبىلىم بەرۋ جۇيەسىنىڭ كادرلىق الەۋەتىن كۇشەيتۋگە باعىتتالعان پيلوتتىق جوبا اياسىندا ءوتتى.
كەزدەسۋ بارىسىندا ستۋدەنتتەردىڭ وقۋ ۇدەرىسى، جاتاقحانامەن قامتىلۋى جانە بەيىمدەلۋ ماسەلەلەرى تالقىلاندى. سونداي-اق قاتىسۋشىلار جوبانى ودان ءارى جەتىلدىرۋ بويىنشا ءوز ۇسىنىستارىن ورتاعا سالدى.
اتالعان جوبا اياسىندا بيىلعى تامىز ايىنان باستاپ ۋنيۆەرسيتەت ماڭعىستاۋ وبلىسىنان تالاپكەرلەردى قابىلدادى. ستۋدەنتتەرگە تەگىن وقۋ، جاتاقحانامەن قامتاماسىز ەتۋ، سونداي-اق تىلدىك جانە باسقا دا ۇيىرمەلەرگە قاتىسۋ مۇمكىندىگى قاراستىرىلعان.
قازىرگى تاڭدا جوباعا 19 ستۋدەنت قاتىسىپ وتىر. ولار العاشقى سەمەستردى ءساتتى اياقتاعان. باعدارلاما سوڭىندا تۇلەكتەر مەملەكەتتىك ۇلگىدەگى ديپلومدارمەن قاتار قوسىمشا سەرتيفيكاتتارعا يە بولادى.
اسحات ورالوۆتىڭ ايتۋىنشا، ماڭعىستاۋ وبلىسى ءۇشىن باسەكەگە قابىلەتتى ماماندار دايارلاۋ – ستراتەگيالىق ماڭىزدى مىندەت.
ء"بىز ستۋدەنتتەردىڭ كاسىبي جانە تۇلعالىق دامۋىنا جاعداي جاساپ، وقۋ بارىسىندا جان-جاقتى قولداۋ كورسەتەمىز", – دەدى ول.
كەزدەسۋگە قاتىسۋشىلار جوبانىڭ بولاشاق پەداگوگ كادرلاردى دايارلاۋداعى ماڭىزىن اتاپ ءوتىپ، ونى ءارى قاراي دامىتۋعا دايىن ەكەندەرىن ءبىلدىردى.
