ماڭعىستاۋ وبلىسىندا اقتاۋ–بەينەۋ تاسجولىندا ەكى Toyota Camry كولىگى سوقتىعىسىپ، ءتورت ادام قازا تاپتى، دەپ حابارلايدى "ادىرنا" ءتىلشىسى.
تاعى ءتورت ادام ءتۇرلى دەنە جاراقاتىمەن اۋرۋحاناعا جەتكىزىلدى.
جول اپاتى 16 قىركۇيەك كۇنى ساعات 20:30 شاماسىندا بولعان. الدىن الا مالىمەت بويىنشا، جەتىباي اۋىلىنان شەتپە اۋىلى باعىتىندا كەلە جاتقان Toyota Camry جولدا جۇرگەن تۇيەنى قاعىپ كەتكەن. سوققىدان كەيىن كولىك قارسى باعىتتاعى جولاققا شىعىپ، قارسى كەلە جاتقان ەكىنشى Toyota Camry كولىگىمەن سوقتىعىسقان.
اپات سالدارىنان ءتورت ادام العان جاراقاتىنان وقيعا ورنىندا كوز جۇمدى. تاعى ءتورت ادام مەديتسينالىق كومەككە جۇگىندى.
ماڭعىستاۋ وبلىستىق كوپبەيىندى اۋرۋحاناسىنىڭ مالىمەتىنشە، ءۇش زارداپ شەگۋشى اۋرۋحاناعا جەتكىزىلگەن. 1986 جىلى تۋعان ناۋقاسقا باس ميىنىڭ وشاقتى جاراقاتى، ال 2004 جىلى تۋعان پاتسيەنتكە بىرنەشە دەنە جاراقاتى دياگنوزى قويىلعان. ەكەۋى دە جانساقتاۋ بولىمىنە جاتقىزىلىپ، جاعدايى اۋىر دەپ باعالانىپ وتىر.
1996 جىلى تۋعان تاعى ءبىر زارداپ شەگۋشى بىرنەشە دەنە جاراقاتىمەن تراۆماتولوگيا بولىمىنە جاتقىزىلعان. ونىڭ جاعدايى تۇراقتى، دارىگەرلەر باقىلاۋىندا.
اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 345-بابىنىڭ 4-بولىگىمەن قىلمىستىق ءىس قوزعالدى. ەكى كولىك تە ارنايى تۇراققا قويىلىپ، قاجەتتى ساراپتامالار تاعايىندالعان.
قازىر پوليتسيا جول-كولىك وقيعاسىنىڭ بارلىق ءمان-جايىن انىقتاپ جاتىر. سونىمەن قاتار جولعا شىققان تۇيەنىڭ يەسى ىزدەستىرىلۋدە.
