2024 جىلعى 25 جەلتوقسان. جاڭا جىل الدى. ەل مەرەكەنى كۇتىپ، «وتباسىلىق مەيرام» اتالعان شاراعا اركىم وزىنشە ازىرلەنىپ جاتقان. جاڭا جىل الدىنداعى ادەپكى ىرعاق. سوندا ەشكىم دە بۇل كۇن باسقاشا ەستە قالادى دەپ ويلاعان جوق.
ءدال وسى كەزدە تراگەديا باستالدى. الدىمەن ۇشاق اپاتى جايىندا الىپ-قاشپا، قايشىلىققا تولى مالىمەتتەر تارادى. سودان كەيىن اقتاۋلىق جۇمىسشىلار تۇسىرگەن ۆيدەو ۇزىندىلەرى جەلىنى كەرنەپ كەتتى. سودان كەيىن بارىپ بىرتىندەپ نە وتكەرىپ جاتقانىمىز جايىندا تۇسىنىك پايدا بولدى. كوپشىلىك ەندى قالپىنا كەلتىرۋگە بولمايتىن، تۇزەتۋگە كەلمەيتىن ءبىر نارسە بولعانىن تۇسىنە باستادى. بىراق كوز كورسە دە، كوڭىل سەنبەي تۇردى...
AZAL – «ازەربايجان اۋە جولدارى» كومپانياسىنىڭ Embraer 190 جولاۋشىلار ۇشاعى گروزنىي اسپانىندا سوققى الدى. اۋەلدە جوققا شىعارىلعانىمەن، كەيىنىرەك فيۋزەلياجدىڭ زاقىمدانۋى تۇسىرىلگەن كادرلارمەن سوققى دا راستالدى. باسىندا كىنالى تاراپ بۇلتاقتاپ باقتى...
25 جەلتوقسان كۇنى ادامدار الەۋمەتتىك جەلى مەن ەكرانداردان كوز الماي الدەكىمنىڭ ء«بارى جاقسى» دەگەنىن كۇتتى. الايدا ولاي بولعان جوق.
ۇشاق جارالانعان قۇستاي قالقىپ قانا ۇشا باستاعان. قىسىم تومەندەگەن. قۇرىلىمدىق اپاتقا ۇشىراعانى انىق ەدى. ەكيپاج كەرى قايتۋ جوق ەكەنىن ءتۇسىندى. جولاۋشىلار، سونىڭ ىشىندە بالالار، قارتتار جانە جارالانعانداردىڭ باسىنان نە كەشكەنىن ايتىپ جەتكىزۋ مەن سەزىنۋدىڭ ءوزى ءبىر ازاپ شىعار...
ەكيپاج سوڭىنا دەيىن بارۋعا، امان قالۋعا شەشىم قابىلدادى. مۇمكىن بولعانىنشا جەرگە جەتىپ، قونۋ ماقساتى تۇردى. ونداي مۇمكىندىك قايدا بار؟ اقتاۋ وسىنداي مۇمكىندىككە اينالدى.
قونۋ توتەنشە قيىن بولدى. بىراق جارالى بۇركىتتەي ۇشاق تا جامباستاي قوندى. 29 ادامنىڭ تاتار ءدامى تاۋسىلماپتى، امان قالدى. ولار ۇرەيگە بوي الدىرماعان بولار، بالكىم، كىم ءبىلسىن...
بورتتا 67 ادام بولدى. ولاردىڭ ۇشەۋى سول كۇنى ۇيلەرىنە ورالماعان ەكيپاج مۇشەلەرى ەدى.
يگور كشنياكين. الەكساندر كاليانينوۆ. حوكۋما اليەۆا.
ولاردىڭ ەسىمدەرى قازىر ازەربايجاندا باسقاشا ايتىلادى. ويتكەنى ولار اسپاندا سوڭىنا دەيىن قالدى. ويتكەنى ۇشاق اپاتقا ۇشىراعان كەزدە ولار ءوز جۇمىستارىن جالعاستىردى. وزگەلەردىڭ مەيلىنشە الاڭداماۋىنا ۇيىتقى بولدى.
كەيىنىرەك قاراما-قايشى، كەيدە ابسۋردتىق، نەگىزگى لوگيكاعا قايشى كەلەتىن مالىمدەمەلەر بولدى. تەك قازان ايىندا، تراگەديادان بىرنەشە اي وتكەن سوڭ، رەسەي تاراپى جوعارى دەڭگەيدە تەرگەۋ جۇرگىزۋگە، كىنالىلەردى جازالاۋعا جانە «بۇعان نۇكتە قويۋعا» نيەتىن ءبىلدىردى، وندا دا ەمەۋرىن تۇرىندە.
سودان بەرى ەكى ايدان استام ۋاقىت ءوتتى. بىراق ماسەلەنىڭ نۇكتەسى ءالى قويىلعان جوق. كىنالىلەردىڭ اتى-ءجونى رەسمي تۇردە جاريالانبادى. جاۋاپكەرشىلىك كىمدە – ءالى ايتىلمادى. نەگىزگى سۇراققا ءالى جاۋاپ جوق. ازاماتتىق ۇشاق قالاي عانا اۋە قورعانىسىنىڭ اتىسىنا ۇشىرادى جانە نەگە ەشكىم جاۋاپقا تارتىلمادى؟
ادەتتە ءار جاڭا جىل ۇمىتپەن باستالادى. بىراق قۇربان بولعانداردىڭ وتباسىلارى ءۇشىن بيىلعى جىل ۇنسىزدىكپەن باستالدى. داستارحان باسىنداعى بوس ورىندارمەن. مۇنداي بولماۋى كەرەك ەدى، اتتەڭ...
اپات ءالى اياقتالعان جوق. بەلگىلى فاكتىلەر ايقىندالىپ، ناقتى ءبىر تۇلعالار جاۋاپقا تارتىلمايىنشا، ءىس بىتپەيدى. باكۋ بيلىگىنىڭ دە، ازەربايجان قوعامىنىڭ دا تالابى – وسى. جايشىلىقتا بيلىك پەن حالىقتىڭ مۇددەسى وسىلاي قابىسۋى سيرەك. اكەسىنەن قالعان بيلىكتە وتىرعان ۇل دا كەرەمەت ءبىر ساياساتكەر، ايتۋلى الىپ ەمەس. الايدا وسى وقيعادا ماسكەۋدىڭ ءوز كىناسى جايىندا ايتپاۋىنا جول قالدىرمادى. سوعىسىپ، تارتىسىپ كەلگەن كورشى ارمياندارمەن دە ماسەلەنى بەيبىت رەتتەپ، ءتىل تابىسا باستادى. سول ارمەنيا باسشىسى تاياۋدا رەسەيدە وتكەن تمد باسشىلارىنىڭ ءداستۇرلى بەيرەسمي باسقوسۋىنا قاتىسپاعان ازەربايجان پرەزيدەنتىنە كوپ الدىندا، جاريا تۇردە العىسىن ءبىلدىردى. وسى ارقىلى تاعى ءبىر مارتە ماسكەۋدىڭ مىسىن باسقانداي بولدى. وڭتۇستىك كاۆكازدا ويىنا كەلگەنىن ىستەپ كەلگەندەر شاماسى، ىشتەن تىنعان بولار. ال اۋەلدە جيىنعا بارام دەگەن پرەزيدەنت تۋرا جيىن باستالاردا «جۇمىسىنىڭ كوپتىگىن» سىلتاۋراتىپ، ساپاردان قالدى.
ايتپاقتايىن، بىلتىر اقتاۋداعى اپاتتى ازەربايجان پرەزيدەنتى رەسەيگە كەتىپ بارا جاتىپ، ۇشاقتا ەستىگەن ەدى عوي. تمد تورەلەرىنىڭ بەيرەسمي ءسامميتى بىلتىر وسى كۇنى وتكەن. سوعان بارا جاتقان ازەربايجان باسشىسى ورتا جولدان كەرى قايتقان. كەرى قايتۋ، وتانعا ورالۋ ەندى باستالعان سياقتى...
جانات العاداي
تاريحي اتاۋلارعا قارسىلىق. ازەربايجان مەن رەسەي باسىلىمدارىنداعى جاڭالىقتار ءوزارا نارازىلىق تۋدىردى
