2024 جىلدىڭ جەلتوقسانىندا اقتاۋ ماڭىندا اپاتقا ۇشىراعان «ازەربايجان اۋە جولدارى» ۇشاعىنىڭ زارداپ شەككەن جولاۋشى، نۋرۋللا سيرادجوۆ 18 قازان كۇنى تاڭەرتەڭ ءوز ۇيىندە كوز جۇمدى. بۇل تۋرالى Lent.az سايتى جازدى، دەپ حابارلايدى “ادىرنا”.
اۋە اپاتى بولعان كۇنى سيرادجوۆ جۇبايىمەن بىرگە گروزنىيعا بەت العان. ەرلى-زايىپتىلار ۇلدارىن كورۋگە جانە ونكولوگيالىق اۋرۋىنا وتا جاساتۋعا بارا جاتقان. الايدا اپات سالدارىنان جوسپارلانعان وپەراتسيا وتكىزىلمەي قالدى. ەكەۋى دە اۋىر جاراقات الىپ، باكۋدەگى اۋرۋحاناعا جەتكىزىلگەن. كەيىننەن نۋرۋللا سيرادجوۆ جاراقاتتارىنان ايىققانىمەن، قاتەرلى دەرتتى جەڭە المادى.
ول - اپات كەزىندە امان قالعانداردىڭ ءبىرى.
"مەن ايەلىممەن بىرگە گروزنىيدا تۇراتىن ۇلىما بارا جاتقان ەدىم. ۇشاق العاش رەت سوققىعا ۇشىراعاندا، اياق استىمدا وتتىڭ جالىنداعانىن سەزدىم دە، جاراقات الدىم دەپ ويلادىم. ايەلىمدى سابىرعا شاقىرۋعا تىرىستىم. بىراق وزىمدە ۇرەي باسىم بولدى. بەلدىكتى شەشىپ، اياق استىنا قاراعانىمدا ۇشاقتىڭ ەدەنى ءبۇتىن ەدى. مەن قايتادان ورنىما وتىردىم. سول كەزدە ۇشاقتىڭ ارتقى بولىگىنە الدەقايدا قاتتى سوققى ءتيدى. ستيۋاردەسسالار جولاۋشىلاردى سابىرعا شاقىرىپ، گروزنىيعا قونامىز دەپ حابارلادى", – دەگەن ەدى سيرادجوۆ.
ەسكە سالساق، 2024 جىلدىڭ 25 جەلتوقسانىندا باكۋدەن گروزنىيعا باعىت العان AZAL اۋە كومپانياسىنىڭ ۇشاعى اقتاۋ ماڭىندا اپاتقا ۇشىرادى. بورتتا 62 جولاۋشى مەن 5 ەكيپاج مۇشەسى بولعان. ولاردىڭ 29-ى ءتىرى قالدى.
وقيعا بويىنشا تەرگەۋ بارىسىندا ازەربايجان تاراپى ۇشاق اپاتىنا رەسەي اسكەري كۇشتەرىنىڭ قاتىسى بار ەكەنىن مالىمدەپ، ءتيىستى دالەلدەر ۇسىنعان.
2025 جىلعى قازاندا رەسەي پرەزيدەنتى ۆلاديمير پۋتين مەن ازەربايجان باسشىسى يلحام اليەۆتىڭ كەزدەسۋىندە پۋتين رەسەيلىك تاراپتىڭ كىناسىن مويىنداپ، اپاتتى «رەسەيلىك اۋە كەڭىستىگىندە ۋكراين دروندارىنىڭ بولعانىمەن بايلانىستى» دەپ ءتۇسىندىردى. سونىمەن قاتار رەسەي ازەربايجانعا اپاتتان زارداپ شەككەن ۇشاق ءۇشىن وتەماقى تولەۋگە ۋادە بەردى.
اپاتتان كەيىن ءبىر جىل وتسە دە، بۇل وقيعا ەكى ەل اراسىنداعى ەڭ اۋىر جانە قايعىلى وقيعالاردىڭ ءبىرى بولىپ قالۋدا.
